Vonde monadis sul negazionisim climatic

La comunitât sientifiche e à bielzà tirât dongje une vore di provis che il riscjaldament globâl al è causionât des ativitâts umanis. Ven a stâi, massime pal ûs dai combustibii fossii e par vie des emissions dai gas sidrere. Cun dut achel, il probleme, za grivi par so cont, dispès al ven no dome refudât o, par dî pôc, minimizât, ma ancje platât cun critichis che sot vie a soflin di stimâ che al sedi alc di esagjerât. E alore, miôr contindi che il fenomen al sedi naturâl e no di divignince umane, che lis consecuencis no sedin seriis o che la soluzion e deventi costose di mendâ e fintremai inutile. In sumis, miôr fâ fente di nuie e voltâsi di chê altre bande!
◆ Informazions sbaliadis o faladis a vegnin dispès buridis fûr par interès economics e politics di setôrs che a podaressin jessi condizionâts in mût negatîf de transizion ecologjiche che e impliche invezit un procès di mudament globâl intun model socioeconomic sostignibil.
◆ Dut câs, saborâ inciertecis inte int al à l’efiet di intardâ lis sieltis politichis necessariis par frontâ la crisi climatiche. Se i citadins a sintin che i esperts a àn opinions contraditoriis, si disorientin e a deventin simpri mancul propens a pretindi proviodiments par ridusi lis emissions di gas che a incuinin. Cualchi leader al stramude fintremai il refudâ la crisi climatiche intune bandiere ideologjiche, presentant lis politichis ambientâls come se a fossin une menace pe incressite economiche, pe libertât individuâl e pai interès nazionâi. Si limitin a sostignî che a saran lis tecnologjiis dal avignî a comedâ dut; baste spietâ e, a ogni mût, la responsabilitât e je simpri di cualchidun altri.
◆ Argomentazions di cheste fate a slontanin il coraç di fâ cualsisei azion, deventade aromai no dome necessarie ma ancje urgjente.
◆ Nol è plui timp di tirâsi indaûr, bisugne fâi cuintri ae disinformazion e ai interès economics che le sticin. La responsabilitât e je di ducj. Cjapìn la ricercje sientifiche che no mole di lâ indenant, ma che no simpri e je comunicade di mût che sedi comprensibile da pît insom; e ancje la difusion deliberade di informazions imprecisis o straviantis che a coventin par manipolâ la opinion publiche, ma tignìn ancje di cont che nô midiesims no sin subit pronts a meti in discussion i nestris stîi di vite, lis crodincis e i compuartaments sodâts e che a son stâts vincents fin vuê.
◆ Dut vêr ma, come par solit, no si à di sbassâ la vuardie. Primari al è simpri confrontâ lis informazions che o leìn o sintìn e formâsi une opinion personâl su la fonde di dâts sientifics verificabii. In vuê, internet e la tecnologjie nus ufrissin une oportunitât mai capitade e che scugnìn disfrutâ, ven a stâi chê di vê acès a une cuantitât sconfinade di informazions. Plui di mai si trate di scartâ chês negazionistis. Un lavôr informatîf grant e util lu puartin indenant la Comission europeane (www.climate.ec.europa.eu), il Centri di Ricercje Internazionâl sui cambiaments climatics (www.cmcc.it), la Istituzion governative di ricercje (www.isprambiente.gov.it) e altris.
◆ I scrupui, biadelore che a vegnin, disviìnju bande il negazionisim climatic e no sui dâts de ricercje e su ce che i nestris voi a viodin. E je ore di niçâsi, di fâ e pretindi azions. Vonde monadis! ❚