Donatella Malfitano, origjinarie di Gonârs, e je funzionarie de ONU pes missions umanitariis e ambientâls, ativiste animaliste e gjornaliste.
“A disesiet agns o ai scomençât a lavorâ tant che gjornaliste pal Gazzetino, colaborazion che e je durade par vot agns; po dopo mi soi trasferide a Brussel par motîfs di studi, e chest trasferiment è stât in cualchi mût la “faliscje” che e à dât vite ae mê passion pai viaçs.
◆ O ai simpri vût sedi il desideri di deventâ gjornaliste di vuere che chel di fâ la veterinarie: di uns trente agns incà mi interessi di lavorâ par missions internazionâls che mi àn dât la oportunitât di conciliâ dutis dôs lis passions.
◆ A vuê, o ai lavorât a plui di 35 missions intune vore di Paîs diviers (par esempli intai Balcans, Afriche, Congo, Mauritanie, Yemen, Tunisie, Oceanie, Australie, Pakistan, Gnove Guinee, intal Medi Orient e in Irak) che mi àn impegnade dal pont di viste umanitari, ma no dome: o ai sielt simpri di vê un voli di rivuart ancje pes cundizions di vite dai animâi che si cjatavin tai lûcs des diviersis missions, cirint di fâ il pussibil par tutelâju.
◆ A son esperiencis une vore formativis e che a insiorin, soredut parcè che mi àn permetût di movimi e lavorâ in contescj tant lontans e diviers fra di lôr.”
_
Che nus conti cualchidune des sôs esperiencis principâls tant che funzionarie de ONU.”
Intal 1997 o ai vivût lis mês primis esperiencis in mission: cul OSCE (Organizazion pe Sigurece e la Cooperazion in Europe) o ai sorevisionât lis primis elezions in Bosgne, un Paîs che mi à lassât emozions e ricuarts indelebii. Pes missions là che mi soi interessade de cuistion eletorâl, mi soi specializade in mût particolâr inte comunicazion/sensibilizazion, in mût di judâ i guviers locâi a elaborâ strategjiis di comunicazion che a puartassin a informâ lis personis sul funzionament dal procès eletorâl, sui dirits e la inclusivitât (dispès si trate di cjapâ dentri ancje lis feminis, i zovins, lis personis cun disabilitâts, lis minorancis etnichis e chês religjosis). O ai lavorât a trê missions in Bosgne, po dopo mi è stât ufiert un contrat di lavôr intal Parlament di Brussel, che o ai decidût però di refudâ, parcè che o vevi miôr continuâ a interessâmi des missions in Paîs colpîts di vueris o di altris situazions critichis. In gjenerâl, si tratave di lavorâ in Paîs che si cjatavin dispès in situazions pardabon instabilis, dulà che lis elezions a rapresentavin l’unic podê che al veve il popul par esprimi la sô vôs. Chest podê al jere però dispès ostacolât a fuart di episodis di violence, parcè che il moment des elezions al rapresentave la ocasion che e podeve dâ sbroc a tensions economichis, politichis e sociâls. Nô, tant che ONU, o fasìn il pussibil par morestâ chestis situazions, midiant de assistence e de colaborazion cun guviers e istituzions eletorâls. Di là de esperience in Bosgne, o soi lade a Timor Est a lavorâ pe ONU simpri in ambit eletorâl: chi la ONU e organizave il referendum pe indipendence di Timor Est de Indonesie, che però al è lât a finî magari cussì no in maniere dramatiche. In cheste ocasion, nô o cirivin di judâ te suaze organizative, informant lis personis dai paîs sul lôr dirit di votâ e sclarint ancje cemût votâ. O ai lavorât tant in ambit umanitari, par esempli par une ONG (Organizazion No Governative) in Afriche ocidentâl, e o ai lavorât ancje, simpri in Afriche, intal ambit dal Program Alimentâr Mondiâl (World Food Program).”
_
Cemût aie conciliât il so lavôr in ambit umanitari cu la sô passion e dedizion pai animâi?”
“Lavorant pes missions mi cjatavi intune posizion di privileç che mi permeteve dispès di ocupâmi ancje dai animâi presints sul puest: o ai di fat simpri pensât che al fos gno dovê dedicâmi ancje a lôr, stant che, in lûcs là che za lis vitis umanis a vignivin calcoladis pôc e nuie, lis vitis e lis cundizions dai animâi a jerin pal plui ignoradis dal dut o trascuradis.
Un episodi che mi visi cun plasê al è capitât in Afghanistan, dulà che o jeri lade intal 2001 daspò dal atac al World Trade Center: a Kabul, di là dal gno lavôr, mi soi interessade dai animâi dal zoo de citât, che al jere in cundizions une vore precariis stant che al jere logât propit su la linie dal front de vuere che e jere in vore. I animâi a jerin interorîts des bombis, blocâts intes scjaipulis, e no vevin plui mangjative e nancje curis: jo duncje mi soi ativade cirint di puartâ ce che al coventave par fâju sorevivi e par tutelâju, cul jutori di altris personis dal puest.
Un altri episodi che i ten tant a contâ al è capitât te Cueste di Avoli, dulà che, dilunc de vuere civîl, lis bestiis dal zoo a jerin restadis cence nuie, e in cundizions pardabon estremis. Ancje chi o ai puartât jutoris, o ai fat une racuelte fonts li de agjenzie de ONU che o lavoravi, e intant o cirivi di convinci lis autoritâts locâls a trasformâ il zoo intun parc protet, vint a ce fâ però cu la mentalitât locâl che si oponeve a chestis iniziativis.
A son stâts tancj altris Paîs là ce mi è capitât di curâ, difindi e dâ in adozion animâi.
In cualchi scuele elementâr, tal mês di Mâi passât, o tignivi incuintris di educazion ambientâl e animâl, sclarint ai fruts che i animâi a son creaturis che a sintin, e cirint di dâur nozions gnovis: cheste ativitât e à cjatât un sucès tant grant e mi à dât sodisfazions enormis.
O calcoli che dapardut, intal mont, la educazion e la istruzion a sedin la clâf pal cambiament.” ❚
