Vite sul confin dal Imperi tor de “grande” vuere (prime part)

Se o cirìn di jessi cence pêl sul stomi, o vin ancje di scoltâ chei che a jerin di chê altre bande. Jerino talians chei che a stavin cu la Austrie, te Contee di Gurize e Gardiscje? Si capìs, e ancje une vore plui di chei che a vivevin di là dal clap, par vie che i talians tal Imperi a jerin di minorance. Prime de “grande” vuere, o jerin un popul rispietât tal Imperi, si che duncje, se ben minorance, o jerin un popul; invezit dentri di un stât nazionâl come la Italie, cui che nol jere parsore di ducj, nol jere plui popul ma minorance. E dopo, nol è vêr che o fossin strupiâts par vie che o jerin in “cuatri”. A Gurize, la toponomastiche e jere cuasi dute taliane, anzit talianone!
Chi o contarìn di un paîs che al podarès jessi un embleme di ce che a jerin i Talians e i Furlans in Austrie e ce che la vuere “grande” e à puartât vie tal Friûl bande da la Austrie.
A Visc, paisut za di cinc secui sul confin, tai prins dal Nûfcent, pe politiche si scombateve cence sparagn. I catolics a vincerin al galop tal 1907, e cussì tancj a votarin pal candidât popolâr Giuseppe Bugatto, che – di in chê volte – a chei di Visc i derin il sorenon di Bugatins!
Il “partît dai siôrs” (liberâi) al va indevant tes elezions dal 1911; i socialiscj a saressin cressûts di un alc dopo de vuere.
La “talianetât” e jere sintude dai catolics, ma par lôr, dopo che a rivarin i “fradis liberadôrs”, e je saltade fûr la definizion di “austriacants”, dismenteant che a jerin Austriacs par stât e Furlans, o Talians, par nazion. Tant par spiegâsi, l’imni de Federazion dai Consorzis agricui dal Friûl al scomençave cun “Fratelli siam popolo / di stirpe friulana”, plui tart cambiât in “stirpe latina”!
La prime vuere mondiâl si respirave di lontan. Un zovin popolâr che al studiave a Viene (si clamave Gildo Grion e al jere di Caprive) tal 1912, i scriveve de capitâl al so plevan: «E je tante eletricitât tal aiar, eh? O ai pôre che prest e sclopi la vuere, e alore… adiu, forsi no si viodarìn plui…».
Un memoriâl dal brigadîr de finance taliane, Pietro Margani (1914), al lasse capî dut un incrosâsi di spiâ e cuintraspiâ, ancje cun int dal puest. Cualchi dì prime che la Italie e tacàs la vuere, a Palme a meterin in preson (e dopo a mandarin al confin) Dolfo Del Mestri, un scultôr di Visc, socialist, pe sô azion pacifiste.
Sintint la vuere dongje dongje, il vicjari di Viscon al invidà i paîs a lâ in pelegrinaç tal so santuari di Madone di Strade par implorâ la pâs.
La prime vuere, a Visc, le àn vivude de bande austriache cun dignitât e lealtât. La bugade di fats e di notiziis daspò Sarajevo, e ven notade tal protocol de parochie. Si celebre il corot e, al sclopâ de vuere, al è dut un movisi par cjapâ sù socors pai soldâts e pe Crôs Rosse.
Il plevan, pre Mesrob Justulin, ur regale aes gnovis scuelis un crocifìs e al scrîf su la cronache une memorie, poiant la sô patrie. Ma lui, che al saveve lei la storie, al diseve ancje: «…Ma la tribulazion e je una vore grande e, se la vuere no finìs prest, e cressarà ancjemò cun carestie, malatie, ribelions, disordins. Che Diu, di infinide misericordie, ur dedi un definitîf trionf a lis nestris armis e une lungje pâs».
In altris bandis, te vilie dal intervent, si dâi glorie ae vuere. Cussì a Pordenon, ai 23 di Mai: «…si cjate ancje int che e vûl partî… e tentâ di rivâ al spetacul sul cunfin di Visc o di Cormons… ilusion che lis patuliis dai carbinîrs a scancelin subit cul fermâ lis machinis dai Pordenonês e mandâju a c jase…».
A Palme, il comandant dal “Cavalleggeri Roma” al anunzie ai soldâts la ore supreme e che a lôr ur sarès stât dât il privileç di lâ par prins “a liberâ dal jôf stranîr i fradis che a suspiravin il ‘riscat’, e al busse cun passion il standart fra i berlis di gjonde e il deliri di dute la int”.
“Visco nostra”, al à contât che si veve sintût in Sicilie cheste gnove come se e fos une citât fisse fisse di personis e fin za cualchi an, la esclamazion, di serie, e jere deventade un cjoli vie.
“Ai 24 di Mai lis trupis talianis a jentrin a Visc cence trai un colp. Visc al è aromai part dal ‘bel Paese là ove dolce il sì suona’. Par vie che la stesse zornade al jere stât internât il Dean, ai 2 di Jugn al jere comandât di rezi cheste parochie decanâl il predi don Attilio Ostuzzi”. La note dal stes plevan e conte une veretât une vore plui dramatiche.
Il sì al sunave prime in chest cjanton dal biel paîs che al jere part di un altri Stât; al sunave une vore ben ancje par vie di scuelis di gale. La ocupazion italiche, invezit, no je vignude a puartâ la pâs, ma e à sglavinât disgraziis, dolôr e vendetis ferocis di ogni sorte.❚
(ve la segonde part sul numar di Dicembar).
✒ Ferruccio Tassin