Baba Crachi al à 23 agns e dut l’entusiasim dai zovins de sô etât. Al à une bocje di ridi che e tache il bonspirt.
E al à un sium, chel di fâ il gjornalist. Cumò, però, al à bisugne di lavorâ par judâ la famee. Al è in Italie dal Jugn dal 2007.
LIS DIFICOLTÂTS DAL INIZI_ Al è rivât tal Centri di acet “E. Balducci” di Çuian tal Mai dal 2008, daspò vê vivût plui di 5 mês te stazion dai trens di Udin, durmint tes cabinis automatichis par fotografiis e te sale di spiete, fintant che, daspò di un ricovar in ospedâl, il Comun di Udin lu à indreçât a Çuian. Dilunc de permanence al “Balducci”, al à fat un cors di lenghe taliane e un altri di eletricist al Civiform di Cividât. Une formazion impuartante, stant che cumò Baba al fevele benon talian – e al sa ancje cualchi peraule di furlan – e al fâs l’eletricist par une dite di Çuian cu la formule de borse-lavôr, in gracie dal Comun di Udin. A son dome trê mês, ma il zovin ghanês al spere che cheste esperience i vierzi lis puartis dal mont dal lavôr regolâr. Sì, parcè che Baba, tant che tancj altris imigrâts, nol è stât cu lis mans in man. Si è simpri rangjât a fâ cualchi lavorut – dal muredôr al zardinîr – par tirâ dongje cuatri carantans par mantignîsi e di mandâ ai siei in Ghana. Al à cirude une cjase – ma cence un contrat di lavôr regolâr nissun te fite -; le à cjatade traviers de associazion “Vicins di cjase” tal cuartîr di Sant Domeni a Udin, dulà che al vîf, dal an passât, intun monolocâl de comunitât. E je la ultime tape di un viaç lunc 7 agns.
LA STORIE_ Baba al lasse il Ghana a 16 agns, daspò che, par motîfs politics, i copin il pari, esponent dal Npp, il New patriotic party. Ferît ancje lui tal scuintri, Baba al scjampe e a Boku, vint pôre pe sô stesse vite, si unìs a doi zovins bande il Nigjer. Po al rive in Algjerie, duncje in Libie e, vie mâr, a Siracuse. 1500 dolars il cost de traviersade: «Trê dîs cence mangjâ – al ricuarde –, o vevin aghe dome pe prime dì. O jerin in 28 su la barcje. O ai vût cetante pôre». E ancjemò, trê setemanis tal cjamp sfolâts di Siracuse, scuasi trê mês a Croton e, in sachete il permès di permanence umanitarie, la rivade in Friûl. Cumò Baba al à un permès par protezion sussidiarie che i scjadarà tal mês di Setembar. Mi dîs che nol restarà in Friûl par simpri, ma al varès gust di fermâsi ancjemò un pôc. Al pense, di fat, ai sîs fradis e sûrs che al à lassât in Ghana e che a àn bisugne di jutori.
LA VITE IN FRIÛL_ Baba al pant che achì, in Friûl, nol è mai stât ben fin insom.
I domandi parcè. Nol dipint de sieradure dai furlans, che pûr, al amet, e je stade une dificoltât sul imprin. «A son cuatri agns che o cîr un lavôr stabil e une cjase – mi spieghe –, li che o soi a Sant Domeni, no podarai restâ par simpri. Lis leçs talianis in materie di imigrazion a cambiin di un continui e o ai pôre che, di une dì a chê altre, mi mandedin vie». Tes peraulis di Baba no je nissune lagnance ni nissune pretese. Baba al domande dome di lavorâ, ancje “cuntune paie plui basse di un talian”. Al met in bande i siei desideris. «Se o ai voie di vivi – al dîs –, o ai di fâ ancje chel che no mi plâs». Nissune gnove. Che i imigrâts a vedin di fâ chel che i talians, massime chei zovins, no àn plui voie di fâ, si lu sa. Lu à dit di resint ancje il ministri de Economie, Giulio Tremonti, a Washington in ocasion dai lavôrs dal Font monetari internazionâl. Altri che robâ lavôr ai talians, tant che al dîs cualchidun. E no je une gnove – volint resonâ dome inte logjiche, prevalente, di marcjât e convenience – che i imigrâts a sedin fondamentâi pal ecuilibri dai conts publics talians, pal funzionament dal marcjât dal lavôr e pe ufierte di servizis ae persone. Dome cumò, chei che a son in Italie – plui di 4 milions – a produsin une ricjece dal 10,6 par cent dal Pil nazionâl.
UN LEGJISLAZION CHE NO JUDE_ A chei che a spaurissin la int cu la menade dai imigrâts che a robin, che a puartin delincuence, Baba al rispuint che «cui che al fale, al è just che al paiedi, ma no si pues fâ di ogni jerbe un fas». Pluitost, al osserve, «a son i sorestants che a varessin di fâsi un esam di cussience. A fasin leçs dome par parâ i lôr interès, leçs injustis sedi pai talians sedi pai forescj. Si è laris – al dîs – ancje cence pontâ la sclope».
No cate lis dificoltâts, Baba no si rint.
Al cjale al avignî cun sperance, gracie ancje a cui che i sta dongje. Il pinsîr al va a une famee di Savogne, che lu ten tant che un fi, e a ducj chei che, in formis diferentis, i àn dât acet e lu àn judât. Baba al à agrât e al continue a sperâ che, une dì, al rivarà a coronâ il so sium, chel di deventâ un gjornalist-documentarist, par contâ ce che al sucêt tal so paîs e ae sô int, fuart dal amôr pe sô tiere.
Erika Adami
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +