VIERZIDURE – In File, cui voi dal popul

La storie furlane viodude cui voi dai puars le veve za screade Tito Maniacco, cun I senza storia”; che al fos pussibil fâ une cuintristorie” dal nestri popul lu veve za sclarît pre Bepo Marchet; ma cumò che lôr no son plui achì a contânus cemût che i nestris vons cence blason a vevin lassât un segn te linie dal timp, chest compit al passe a storics come Furio Bianco, docent de Universitât dal Friûl e espert di storie moderne.
Il professôr Bianco al à viert i incuintris di In file” ai Colonos di Vilecjace cuntune serade su La crudel zobia grassa” dal 1511. E nol podeve jessi di miôr par vierzi il cicli dedicât ai ribaltons”, parcè che lui – a partî de publicazion di Contadini e popolo tra conservazione e rivolta. Ai confini orientali della Repubblica di Venezia tra ‘400 e ‘800″ – al è une autoritât rispiet a ducj chei moviments di proteste e ribelion che a àn savoltât il Friûl e la Europe interie dal 1348 al 1789.
IL CONTEST STORIC_ Chel dal 1511 al è un savoltament particolâr – al conte – che al è espression clare di une ete dulà che la Italie e la tiere di Vignesie a jerin intune situazion dificile”. Cui Turcs aes puartis, la Francie e la Spagne che si zuiavin la penisole daspò che Carli Otâf al veve rot ogni ecuilibri politic, la pâs par Vignesie e jere utopie. La leghe di Cambrai comandade de France e veve batût i venits a Agnadello tal 1509 e la Serenissime e jere pardabon stremade. I siôrs de periferie in chê vuere a forin protagoniscj di maçalizis no di pôc: a Muçane lis masnadis di Frangipane a gjavarin vie une gamele di voi ai contadins che no prontavin la mangjative par lôr”.
IL RIBALTON_ Il professôr Bianco al cjale a chescj fenomens come a une precondizion necessarie par un ribalton”: par vê un savoltament di contadins nol coventave par fuarce che la int e patìs la fam. Al bastave che no fos rispietade la economie morâl” che e dîs che i sorestants no àn mai di gjavâ ai sotans la dignitât di vê alc par sorevivi ancje se salacor lu cjatavin tes tieris comuns che no vevin nissun paron”. Bianco al à studiât lis proprietât coletivis soredut lant a viodi lis alienazions che Vignesie e à fat di lôr lant a deprivâ i vilans dal Friûl e de Cjargne di buine part de risultive de lôr sussistence (Nel bosco. Comunità alpine e risorse forestali nel Friuli in età moderna” dal 2001). No dome: lant a scrutinâ di insom fin dapît lis cjartis dai tribunâi de Serenissime e di chei eclesiastics al à scuviert storiis di bandîts e brigants che nus regalin un cuadri no propit compagn a chel dal furlan salt, onest e lavoradôr”: baste lei Contadini, sbirri e contrabbandieri nel Friuli del ‘700″, jessût tal 2005.
VERETÂT CENCE PREJUDIZIS_ Bisugne cirî dut ce che il timp al à tasût: chest al è il compit dal storic” al dîs Bianco, che al specifiche che par fâlu no bisugne vê nissun prejudizi. Si scuen cjalâ lis robis cemût che a son, cence volê dimostrâ tesis prefabricadis, che no puartin di nissune bande e a convincin dome chei che a vuelin jessi convints”. Ma cence volê dimostrâ l’indimostrabil Bianco al è sigûr che il 1511 al mostre come che il Friûl al resti al centri di un scjas european che in chei agns al viôt i contadins ribelâsi in Gjermanie, Austrie e tai Balcans. Un sfuarç di comparazion jenfri di chestis ribelions al è un lavôr seri che al è di percori fin dapît” al spieghe Bianco, che al riten necessari capî cemût che chescj episodis di justizie somarie” che a vegnin dal bas a presentin une logjiche e un imagjinari cence cunfins”. La lote dai vilans si sparnice pardut: in Alsazie tal 1513, in Transilvanie tal 1514, in Slovenie tal 1515, tal Imperi daspò de Riforme protestant cu lis rivoltis di Thomas Muntzer in Gjermanie e Michael Gasmaier in Tirôl tal 1525, fin a rivâ a chê di Matija Gubec in Cravuazie tal 1573. Bataiis che a vuelin reclamâ rispiet pes autonomiis e pai dirits elementârs dai popui, e che a mostrin cemût che la int si cjalcje ma no si creve e – cuant che mancul tu tal spietis – e stice fûcs che no si rive a distudâju facilmentri. Ma une robe e je la fuarce, che e rive a svindicâsi dai nobii cuntune crudeltât e une tristerie cence limits, une robe e je la cussience: e se ator pe Europe i cjâfs des rivoltis a son deventâts erois, incjarnazions de identitât dai lôr popui, nô di che Joibe Grasse o savìn dome che la furie dai contadins e fo sbrenade di un nobil, e ancjemò venit, come Antonio Savorgnan – che tal 1512 al fo copât a Vilac e il so cuarp dât di mangjâ ai purcits. Puar chel popul che nol cognòs i siei erois…
Walter Tomada