Ai 27 di Fevrâr dal 2011 a saran juste cinc secui de zornade, la Joibe grasse dal 1511″, li che plui elements che a jerin za in moviment in Friûl a precipitarin tune insurezion popolâr che, prime a Udin po intune grande part de nestre tiere, e metè in discussion, in maniere radicâl e violente, i ecuilibris di podê politics e sociâi di chê ete.
La storie dal Friûl, lassant in bande chei che si ocupin di storie in maniere professionâl o par passion, e je za avonde pôc cognossude; chest aveniment, che al à une impuartance cence confronts pe sô vastitât te storie de Rinassince taliane (e salacor i paragons si à di fâju cun altris tieris de Europe centrâl), al è inmò di plui tignût intun cjanton.
CONTEST EUROPEAN_ Il contest li che si davuelç al è ancje internazionâl: dal 1420 chê che e jere stade une esperience statâl plurisecolâr, il Patriarcjât di Aquilee, e jere finide e il Friûl dividût intune part sot de Republiche di Vignesie e une orientâl sot dal Imperi, in barufe continue tra lôr par cuestions di legjitimitât e jurisdizion. L’imprin dal Cinccent al segne, soredut a partî de Leghe di Cambrai (1508), cuant che Vignesie e je in pratiche in vuere cul mont intîr, un colp mortâl pai siei siums di deventâ une potence europeane e si fisse un confin che, in buine part e cun cambiaments di atribuzion statâl, al durarà fin al 1918. No plui duncje un Friûl tant che lûc centrâl te Europe, come che al jere sucedût te Ete di Mieç, ma un Friûl taiât in doi, margjinâl, sot svilupât e cun funzion soredut militâr, cu la mentalitât e la ideologjie che cheste si puarte daûr.
VIOLENCE DE ARISTOCRAZIE_ Duncje preparazion ae vuere o vuere combatude, ven a stâi violence; za la nestre tiere e jere cjamp di bataie tes lotis cun (relative) basse intensitât tra Venezians e Imperiâi e teren des incursion dai Turcs, ma i agns dal 1508 al 1514 a segnin un nivel di brutalitât che al sarà dificil cjatâ fin a agns dal secul a pene passât; violence e brutalitât che a saran patidis soredut des classis popolârs, dai contadins.
Lis cronachis nus contin une schirie di episodis che a fasin vignî i sgrisui li che i esercits imperiâi o i stradiots venezians a metin a sac i paîs, a ruvinin lis coltivazions, a puartin vie i nemâi, a fasin violence aes feminis e a copin oms, feminis, vielis e fruts cence misericordie. La stesse aristocrazie furlane e je descrite ancjemò te metât dal Cinccent di Jaroni di Purcie tant che une vore ostinade, supierbe, e cjapade de vendete … e di usancis cuasi barbaris”. Un dai protagoniscj di part çambarlane, Francesc Janis, une misture di inteletuâl di alt nivel e di om di azion, l’autôr di une detule ciniche e fulminante: Om muart nol fâs vuere”, mandât come ambassadôr di Vignesie ae cort di Carli V, al descrîf une discussion tra un nobil spagnûl e un talian, che e finìs cul spagnûl che al trai un scufioton al talian e Janis al dîs te maniere dai furlans”.
LA VERSION DAI SIÔRS_ Chescj a son i timps, e dute la enfasi dai comentadôrs antîcs o mancul su la bestialitât dai contadins, sul lôr jessi dominâts dal demoni secont cualchidun, e nas dal fat che dute cheste violence, in cheste ocasion, e ven butade intor ai nobii, tant che il mont si fos ribaltât, tant che la naturâl” subordenazion dai vilans si fos rote.
E dute la narazion che e ven fate, par opare simpri dai rapresentants des classis dirigjentis, e je imbombade di elements che a marchin chest nereôs ribalton dai naturâi” rapuarts tra i sogjets sociâi: de sere dal miercus li che i nobii a fasin fieste, intun ambient che si imagjinisi rafinât, si passe intun marilamp al maçalizi dal dì dopo. I nobii Strumîrs o i lôr colaboradôrs butâts tai poçs, Fidrì di Colorêt che al mûr butât par strade e cui cjans che i mangjin i budiei (simetric al passisi di cjans e purcits dal çurviel di Antoni Savorgnan, cuant che e rivarà la ore de vendete dai Strumîrs), la fieste in place de domenie cui contadins cun intor i vistîts dai nobii che a àn pene licuidâts e che si clamin un cun chel altri ridint cul non di chei: une rapresentazion dal carnavâl, tant che mont al incontrari, poiade suntun plan di realtât.
Vêr al è che di Udin il riviel si sposte tes campagnis, cun miârs di contadins organizâts tes cernidis che si movin cun grande determinazion e a son plui di vincj i cjistiei o lis cjasis nobiliârs brusâts o fiscâts cuntune cjace al feudatari acanide. A fermâ chest moviment i pensarà la Serenissime cuntun intervent militâr al massim nivel e po al sarà il taramot catastrofic dai 26 di Març, e la gjandusse che si puarte daûr, a dâi il colp finâl.
O ai nomenât i Strumîrs, i Çambarlans e la figure dal lôr sorestant Antoni Savorgnan: il cuadri des relazion internis aes classis dominantis in Friûl al jere struturât ator di chescj doi clans che a rapresentavin interès diferents e che a jerin impegnâts intune faide feroce tra lôr; in efiets la interpretazion dominante de insurezion dal 1511 e je stade a dilunc chê di un moviment sburtât e manovrât dai Savorgnans.
LIS FAZIONS DAI NOBII_ I Strumîrs a fasevin riferiment ae nobiltât dai cjistielans, cun fameis principâls i Torians o i Colorêts, cuntune fisse rêt di relazions di parintât tra lôr e cui feudataris imperiâi; a dominavin il Parlament de Patrie dal Friûl che i Venezians a vevin mantignût, ancje se il lôr stât economic dispès nol jere cussì bon, a jerin gjelôs des atribuzions che lis Costituzions de Patrie ur assegnave e no scuindevin une cierte simpatie pe part imperiâl. Chescj aspiets a àn puartât, tant che riflès di une storiografie nazionalistiche taliane che ju piturave come elements contraris a Vignesie (e duncje ae Italie intune cierte interpretazion), une part de storiografie autonomistiche a vê simpatie pai Strumîrs e a imagjinâju come protoautonomiscj furlans. Te realtât al somee che i cjistielans si poiassin aes istituzions de Patrie dome tant che element di conservazion dal lôr podê e che sul plan sociâl a fossin avonde pronts a mudâ i ecuilibris ereditâts de Patrie, par garantî i lôr interès predatoris cuintri de plui part dai furlans. Dal rest cuâi che a fossin i lôr intindiments lu dîs a clâr il manifest di un Colorêt che, fevelant de faide tra i doi clans, al scrîf: cheste inimicizie no je tra Colorêts e Savorgnans, ma tra i feudataris dal paîs e il popul”, intindint tant che popul i popolans di Udin e i contadins.
Chê altre fazion, chê dai Çambarlans e je dominade de figure di Antoni Savorgnan, dissendent di chê famee che e veve spalancade la puarte de Patrie ai Venezians. Cuntune disponibilitât finanziarie cence pâr tra i nobii furlans, contornât di un personâl politic une vore plui fin di chel dai Strumîrs, Antoni al à doi altris vantaçs: al è il referent dal guvier de Serenissime in Friûl (ancje se cjalât di cheste cun simpri plui sospiet) e al sa dâ dongje un bloc di aleâts che i Strumîrs no rivin nancje a imagjinâsi: piçule nobiltât, i popolans di Udin, la comunitât de Cjargne, i contadins che a son organizâts tes cernidis (lis miliziis di autodifese des vilis, necessariis intune situazion cussì militarizade). Al devente une sorte di difensôr dal popul cuintri des prepotencis dai cjistielans, ancje se chê di Savorgnan no je gjenerositât: al è un calcul politic che al à tant che direzion plui o mancul clare chê de creazion di une sô signorie personâl: lis cernidis e la rêt tra lis comunitâts rurâls i coventin parcè che a àn un fuarce significative. Il 1511 al marcarà la fin dal so progjet, Vignesie lu mole, al è lât masse innà stiçant i rivoltôs, e l’efiet al sarà la sô muart violente in esili e l’infuartîsi de faide che e continuarà fin te seconde metât dal 500.
LA AUTONOMIE DAI CONTADINS_ Lis comunitâts contadinis in dut chest rogan si coleghin sì ai interès di Savorgnan ma a conservin une lôr fuarte autonomie: i lôr obietîfs, come par altri in Carinzie, in Slovenie, in Cravuazie in Ongjarie, li che in timps avonde dongje si discjadenin riviei avonde simii, a son la lote cuintri dal fiscalisim e des angariis dai nobii, la difese des tieris di proprietât comune e la domande di rapresentance de lôr vôs; dut chest presentantsi tant che rêt di paîs che si dan dongje pai interès comuns; e chest al è un element di lungje durade te storie dal Friûl.
Come che al scrîf un storic no dal sigûr progressist tant che Pier Silverio Leicht: tra i contadins al jere, tal Cinccent e tal Sîscent, cualchi çurviel avonde fin par capî cuâi che a fossin i interès gjenerâi de lôr classe”. Che fuarce e çurviel no mancjassin ai contadins lu pant il risultât: Vignesie, no par gjenerositât ma par necessitât, è decît di istituî un organisim di rapresentance stabile des comunitâts rurâls e dai lor interès, la Contadinance, che al è un câs unic in Europe. Forsit fevelant di autonomie si varès di partî di chi.
Donato Toffoli
Gnovis / Presentazion dal libri di Erika Adami “Feminis furlanis fuartis”
Redazion
La Patrie dal Friûl e presente il libri “Feminis furlanis fuartis”. Storiis di feminis furlanis dal dì di vuê, pôc o par nuie cognossudis, diferentis par etât, divignince, esperiencis formativis e professionâls. Lis lee la fuarce che a esprimin tal cirî di realizâsi cun tignince, tai cjamps plui svariâts. Cun braùre pes lidrîs e tal […] lei di plui +
Event / Stin dongje ae Patrie – fotos de serade
Redazion
Joibe ai 30 di Novembar al Teatro San Giorgio – Udin (Borc di Graçan) si è tignude la seconde edizion de manifestazion “Stin dongje ae Patrie” che e rapresente un moment di incuintri e di solidarietât cul mensîl “La Patrie dal Friûl”, gjornâl scrit fûr par fûr in lenghe furlane fintremai dal lontan 1946. Inte […] lei di plui +
Pirulis di musiche e di storie / Un pitôr musicâl di San Denêl tal inovâl de sô muart: Giulio Urbanis (1540 – 1613)
Alessio Screm
Stant che tal articul chi sore o ai scrit di iconografie musicâl, la pirule di storie e di musiche di chest mês si intive a celebrâ un pitôr furlan che al à dât cetant in fat musiche piturade, e di lui si celebrin chest an i cuatricent e dîs agns de sô nassite. Lui al […] lei di plui +
Il cjastelîr plui grant di simpri / Sot des pleis de tiere: ae scuvierte de origjin dal çuc di Udin
Serena Fogolini
Daûr di une liende, di un proverbi o di une conte popolâr si plate simpri une fonde di veretât Al sarà forsit par cheste reson che cualchi mês indaûr, jessude la gnove di studis sientifics che a dimostravin la artificialitât dal çuc di Udin, nissun di noaltris si è maraveât plui di tant. Dal rest, […] lei di plui +
Lenghe / A Cormons si fevele dal furlan te informazion
Dree Valcic
L’impuartance dai mieç di comunicazion par la difusion de lenghis minoritariis. Cun Emanuele Galloni, Guido Germano Pettarin, Andrea Valcic. Al à moderat Wiliam Cisilino. lei di plui +
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +