VIERZIDURE – IL SIVILOT. Conseguencis dal masse cjalt o de arogance?

La malsane propueste dal pdl Dal Mas pe fusion cul Venit

Al sarà forsit il timp mat cul masse cjalt che al da tal cjâf, ma ce che al propon il conseîr regjonâl dal Pdl Dal Mas nol sta ni in cîl ni in tiere. Va ben che cui le sbare plui gruesse si cjate cui titolons sui giornâi, ma e volarès un tic di decenze. Ce disial il conseîr di Pordenon? Che invezit de regjon come che è, si varès di fânt une che e met adun Venit e Friûl-Vignesie Julie, cun dôs capitâls Vignesie e Triest, la prime pe culture e la seconde pes infrastruturis portuâls.
Furlans scjafoiâts intun bot dai doi parons di simpri, netâts di drete e çampe. Al somearès di tornâ indaur tai timps, cui venezians che nus dopravin par tignî lontans i turcs e par robâ il pussibil des nestris monts. Ma ancje concedi cjarte blance ai triestins par rivâ a fâ ce che no son rivâts tai ultins 50 agns: scancelâ il Friûl.
Po ben, ognidun al à dirit di esprimi lis sôs ideis, ma al è pardabon dificil gloti lis monadis. Chel che in ogni câs al da plui fastidi no son lis peraulis di Dal Mas, ma che nissun nol vedi vût nuie di ribati.
E chest fat mi fâs pensâ che cualchidun al puedi jessi dacuardi, ma che no vedi il coragjo di dîlu denant di ducj.
L’OM DI BURI