VIERZIDURE – La Fieste dai Popui a Gurize, tra siums e atacs

A Gurize l’Avost passât al è stât, par plui aspiets, une vore cjalt. La Associazion culturâl “Mitteleuropa” (www.mitteleuropa.it) e à inmaneât come tal 2010 la sô fieste tal cjâf lûc de antighe Contee, lassant Cormons (2009 e 2008) e il biel borc di Insìc, dulà che la ultime fieste e je stade fate tal 2007. La manifestazion, davuelte dai 18 ai 21 di Avost in ricuart de nassite dal Imperadôr Francesc Josef I, e vûl clamâ adun chei popui che te storie dal continent a àn tantis voltis vidût i lôr destins cjaminâ a pâr par fâ fieste e tornâ a cognossisi.
La scree tal vinars, come par tradizion, cuntune cerimonie di comemorazion di ducj i muarts e lis vitimis di dutis lis vueris, fate lì dal cimitieri militâr di Braçan.
La sabide e la domenie la fieste si à davuelte te aree de fiestis tal Borc Sant Roc a Gurize, cun musichis, cjants e bai di grops di dute la Mitteleurope.
Te domenie di matine, in Domo, l’arcivescul Dino de Antoni al à tignût une Messe Grande “pe unitât europeane”, in presince des autoritâts e di ducj i grups in costum. Ogni leture e jere intune diferente lenghe dai paîs de Europe Centrâl (cun gjonde, la prime e jere par furlan), po dopo i grops in corteu a son tornâts te aree de sagris in Sant Roc. Pecjât pal scjafoiaç di chês oris, che al à fât cori a cjase une vore di public.
NO CAPÎTS_ Chest an la manifestazion si à cjatade tal mirin di critichis: la presince di une vore di grops forescj in costum tipic par cualchidun al podarès fâi dan a la Fieste dal Folclôr inmaneade ogni an de Pro Loco di Gurize.
Sul argoment, declarazion di stime pal spirt dal event ma soredut chês cuintri dai finanziaments a la “machine dal folk” di bocje dal assessôr regjonâl a la culture e ai rapuarts internazionâi Elio De Anna, presint ai events de domenie, a àn movût une vore di fûcs. Di là di chescj problemis, a son stadis altris reazions che a àn fât glaçâ il sanc tes zornadis plui cjaldis dal an.
A drete o vin vût Sergio Cosma (Fiamma Tricolore), assessôr al sport de zonte Romoli, che al contrari dal so sindic al à cjatât sbaliât fâi une fieste di complean a “Cecco Beppe” tal an dal 150n da la unitât de Italie, stant che “…i vin fat (cui? N.d.r.) cuintri trê vueris di indipendence”. Daspò vê votât cuintri il proviodiment de zonte che al voleve sotignî l’event al à specificât che la fieste e varès fât miôr a restâ a Cormons, stant che la ereditât culturâl di chê citadine e je diferente di chê gurizane.
A çampe, invezit,il conseîr regjonâl Franco Brussa (PD) al à declarât che il sindic Romoli al à sielt di poiâ une manifestazion che e tradìs la storie di chestis tieris e di chei che a son muarts a pro de talianitât di Gurize (un pinsîr par chei di chê altre bande? N.d.r.).
Al è clâr che i prins a no capî une fieste che e celebre il multiculturalisim a àn di jessi i nazionaliscj, tal 2011 la tiere che a talpassin le stentin ancjemò a capî.
Dut câs il spirt dai organizadôrs, ven a stâi la volontât di fâ tornâ a vivi la fradilance de ints dal centri Europe slontanânsi de nostalgjie, si lu leieve a clâr tai voi dai 500 partecipants a la sfilade, ta chei dal public, te omelie de Messe davuelte tal Domo gurizan dal arcivescul De Antoni e tes peraulis cul cûr in man di Paolo Petiziol, president de Associazion Mitteleuropa.
Michele Calligaris