“Ven vie cun mê”, Alessio Screm nus puarte vie radio ator pal Friûl tra musiche, art e personis

Al si intitule “Ven vie cun mê” il gnûf program radiofonic in lenghe furlane che al larà in onde fint ai 25 di Març su lis frecuencis Radio Rai regjionâl, in streaming e in podcast sul sît sedefvg.rai.it, subite daspò la storiche trasmission “Vuê o fevelin di…”. Si trate di un program ideât e condusût dal musicolic e ricercjadôr, nestri colaboradôr, Alessio Screm, sot lis curis di Arianna Zani e de responsabil de struture di programazion Gioia Meloni. Un program che in pirulis di cinc minût al disegne un viaç a tapis atòr par il Friûl, a la scuvierte o discuvierte di lûcs, pâis, borgs, vilis, di ca e di là da l’aghe, tes Alps e te plane fint al mâr, a traviers la musiche, l’art figurative, leterarie, la storie, il paisaç e lis personis.
◆ Difat ogni pontade e ospite une o dôs personis, che dispès e provegnin dal lûc che e si va a visitâ virtualmentri – cu l’invît a fâlu realmentri –, e che in cualitât di esperts, cultôrs di storie locâl, animadôrs culturâi, artiscj, artesans, personaçs cognossût inte suaze dai argoments che e si va tratant, e dan in curt des notiziis, informazions, curiositâts, aneddotos pôc o par nuie cognossûts, tratant ancje di particolârs la plui part riferîts aes bielecis artistichis o naturalistichis de nestre regjion. E inmò, a la fin di ogni pontade e ven propognude une scolte musicâl a teme cu l’argoment tratât.
◆ «Al è un viaç che o fasin a traviers l’etere, lis frecuencis radio, ma che e si pues fâ dal vêr di bande di ducj, e lui invidi a fâ. Une esperience bielissime che mi permet di contâ storiis che e meretin di jessi contadis, cul jutori dai ospit, e fâ piçui ma significatîfs profondiments che dispès e passin sot plan o no passin par nuje», nus rivele Alessio Screm.
«Une aventure nassude come par câs, frut o crôt des ativitâts di divulgazion musicâl e artistiche che o stoi condusint da un toc di timp a traviers la stampe, il video, lis presentazions in presince e cumò ancje par radio. Un mont ce tant fassinant che di cuant che al è nassût nol à mai pierdût la sô utilitât e il so seguit, neancje tal confront dai gnûs media. E anzit, la radio e sa adatâsi ce tant ben a ogni forme di comunicazion, ancje vie streaming e web».
◆ La prime pontade e puarte i scoltadôrs a Pordenon, par cognossi une abilitât dute particolâr dal pitôr dal Rinassiment “Pordenon”, sedi a stai Giovanni Antonio de’ Sacchis, che al ere bravissim ancje tal disegnâ struments musicâi. Une scuvierte che e si fasarà in compagnie dal costrutôr di struments musicâi Mario Buonoconto e cu la scolte finâl dedicade al music pordenonês dal stes periodi: Pieri dal Zochul. Seconde tape e je a Malborghet-Valbrune par une visite al bosc dai pez di risonance, in dulà che il liudâr Giovanni Battista Morassi, pari di une famê di costrutôrs di violins tant rinomade, al à vût par prim l’intuizion di un lûc ce tant siôr di bon len par costruî struments. Cumò la foreste dai pez di risonance e je atrative cun tantis iniziativis che e si davualzin tal cors da l’an. E inmò, si larà ad Aquilee, par esplorâ insiemi a Don Alessio Geretti un particolâr dal mosaic de Basiliche ce tan particolâr e unic, chel dal Bon Pastôr. E indenant, si larà a Barcis, Glemone, Codroip, Val Resie, Prefuart, Mortean, Cormons cun ospit speciâl Bruno Pizzul. Tanti storiis di lûcs, art e personis, patrimonis che e fasin il nestri Friûl lûc di cognossi e mai bandonâ. ❚