La Slovenie aes elezions par rinovâ la Cjamare di Stât

Vincj partîts e listis a àn presentât candidaturis pes elezions ae Cjamare di Stât, la cjamare basse dal Parlament sloven, inmaneadis par domenie ai 24 di Avrîl. Daûr dai dâts de Comission eletorâl stâtal, la plui part lis à presentadis in dutis vot lis circoscrizions eletorâls de Slovenie.
◆ I partîts che bielzà a son te Cjamare di Stât a àn rivât adore a depositâ lis lôr listis in dutis vot lis circoscrizions. Chescj partîts a son il Partît democratic sloven (Slovenska demokratska stranka), Liste di Marjan Šarec (Lista Marjana Šarca), Democratics sociâi (Socialni demokrati), Sinistre (Levica), Gnove Slovenie (Nova Slovenija), Partît di Alenka Bratušek (Stranka Alenke Bratušek), Partît democratic dai pensionâts di Slovenie (Demokratska stranka upokojencev Slovenije), Partît nazionâl sloven (Slovenska nacionalna stranka) e il moviment Metìn adun la Slovenie (Povežimo Slovenijo), che al cjape dentri ancje Concretementri (Konkretno). Chest ultin partît pal moment al è te coalizion di centridiestre al guvier, vuidade dal prin ministri Janez Janša, insiemi cul Partît democratic sloven e Gnove Slovenie.
◆ Pes elezions dai 24 di Avrîl a àn presentât listis ancje altris partîts che come cumò no son tal Parlament: Moviment Libertât (Gibanje Svoboda), Vesna partît vert (Vesna zelena stranka), La nestre regjon (Naša dežela), Partît dai piratis di Slovenie (Piratska stranka Slovenije), Pal popul di Slovenie (Za ljudstvo Slovenije), Liste di Boris Popovič (Lista Borisa Boris Popoviča), Liste popolâr apartitiche dal moviment Societât sane (Nestrankarska ljudska lista gibanja Zdrava družba), Veretât (Resni.ca), Leghe patriotiche (Domovinska liga). Simpri tra i partîts che no son presints tal Parlament, Il nestri futûr (Naša prihodnost) e Un bon stât (Dobra država) si presentin cuntune liste comune.
◆ Aleance liberìn la Slovenie al à presentât listis dome in siet circoscrizions eletorâls.
◆ Ancje in Slovenie lis listis a son validis daspò de conferme dal lôr valôr legâl.
◆ Al è interessant dâ un cuc ancje ai candidâts in rapresentance des dôs minorancis nazionâls taliane e ongjarese. Tant che deputât in rapresentance de comunitât nazionâl taliane si son candidâts il deputât in carghe Felice Žiža e Maurizio Tremul, che di cetancj agns al è president de Union taliane.
◆ Tra chei che in Slovenie a partegnin ae minorance taliane, a son 2771 a vê dirit di vôt.
◆ Trê a son invezit i candidâts a deputât in rapresentance de comunitât nazionâl ongjarese. A son il deputât in carghe Ferenc Horvath, Otto Mocˇnek e Mihael Kasaš.
◆ Tra chei che a partegnin ae minorance ongjarese, a son 5563 che a an dirit di vôt.
◆ Chestis no saran lis unichis elezions tal 2022 de Republiche di Slovenie. In Atom si votarà inmò par sielzi il gnûf president de Republiche; ai 20 di Novembar a saran ancje lis elezions comunâls.❚