Dopo doi mês gnûf guvier pe Slovenie

Dai 22 di Març ai 22 di Mai: a son coventâts doi mês juscj par che la Slovenie e rivedi a vê un guvier gnûf dopo i cuatri agns cun Robert Golob tant che vuide di un esecutîf di centriçampe. Aes ultimis elezions pe Cjamare di Stât di Lubiane, al jere stât propit il so partît (Gibanje Svoboda-Moviment Libertât) a gafâ il prin puest cuntun seç in plui a pet dal Partît Democratic Sloven (Sds-Slovenska demokratska stranka), 29 cuintri 28 sui 90 seçs de Cjamare. Po ben, stant che cumò a sentin culì i rapresentants di 7 partîts e no di 5 come te legjislature passade cuntun orientament politic plui di centridrete, ve che Janez Janša, 67 agns, president e fondadôr dal Sds, al è rivât adore a meti adun une coalizion che e podarà guviernâ il Paîs pai prossims cuatri agns. Par Janša al è il so cuart guvier dopo jessi stât prin ministri dal 2004 al 2008, dal 2012 al 2013 e dal 2020 al 2022. L’esecutîf gnûf, il decim sest de storie de Slovenie indipendente, al à 14 ministris plui un ministri cence puartesfueis, e al cjape dentri, di là dal Sds (28 seçs), i partîts NSi, SLS, FOKUS (9 seçs) e i Demokrati di centridrete (6 puescj). Par rivâ a une maiorance di 46 vôts, Resni.ca cui siei 5 deputâts al à sigurât une poie esterne cence jentrâ tal guvier. In ocasion dal vôt di fiducie, fat in maniere segrete, e je rivade la prime sorprese: i ‘sì’ pal guvier a son stâts 51 cuintri di 36 ‘no’. Di dulà sono rivâts i vôts in plui? Dal sigûr di bande dai doi deputâts che a rapresentin lis dôs minorancis nazionâls ricognossudis, vâl a dî chê ongjarese cun Ferenc Horváth e chê taliane cun Felice Ziza. Di fat, di cuant che e je in vore la democrazie parlamentâr tal Paîs nestri vicin, i deputâts des minorancis a poin la creazion dai gnûfs guviers, pronts dut câs a votâ cuintri cuant che a son in discussion leçs no a pro de tutele des comunitâts di lenghe ongjarese e taliane. Dilunc dal so discors te Cjamare li che al domandave la fiducie, Janša al à menzonât lis dôs minorancis, marcant il fat che la lôr presince e je un valôr in plui par dute la Slovenie. Di bande sô, Ziza al à ricuardât di vê votât la fiducie ancje par vie che i vôts dai doi deputâts des minorancis no saressin stâts decisîfs: cuissà se un doman lu saran. ❚