Une scarpe e un scarpet. Une Regjon a dôs velocitâts

Istât, la temperadure e cres in Friûl. No dome pai anticiclons, ma soredut pai antifurlans, che a cjatin simpri gnûfs trois par meti in discussion la nestre identitât e la presince publiche de lenghe che le pant. Nol impuarte se chest al vûl dî no vê capît nuie ni dal spirt ni de inteligjence, che a àn sburtâts i nestris vons a cjatâ simpri lis soluzions adatis a la cundizion de lôr ete, ni di un contest come chel furlan che si è modificât a nivel sociâl, economic, politic e culturâl: la determinazion di tancj a dineâ la stesse esistence dal Friûl e je un spieli dal pericul che si cjatìn devant, chel de estinzion di un popul e di une lenghe che a son sorevivûts par secui inte miserie e che cumò a son a pericul di disparî, propit cuant che la int di chenti e je plui siore e passude.
◆ Nol è facil dâ cuintri al trop di int che – sburtade dal nazionalisim talian che al è simpri plui dominant o inçusside di une omologazion che e je ancjemò plui insidiose – no si rint cont di jessi part di une storie lungje e plene di moments di grandis dificoltâts e contradizions. Purpûr ancje tes situazions plui griviis si son cjatâts oms che a disevin cun fuarce che il Friûl al à une sô identitât e une sô storie, e al à dirit a un so autoguvier. E cumò? Ce vino fat par meretâsi di viodi scancelade cheste identitât?
◆ Prin di dut: e je une cuistion politiche. Ma no partitiche. Parcè che a cjalâ ben, la vision che e met in bande il fatôr identitari e je compagne, a drete e a çampe. A chei che a àn votât Fedriga aes regjonâls ur jerial clâr che pe sô maiorance il Friûl nol esist, e al è un teritori inutil che si slargje tant che retropuart di Triest e che al è simpri declinât – in tiermins economics e produtîfs, ma ancje turistics e culturâi – come FVG? Al sarès just a chest pont domandâ il cont di chest ai elets furlans che a acetin di vendi la lôr identitât par sentâsi suntun scran strapaiât cui bêçs di chei che cumò, pe lôr cidine complicitât, no si clamaran plui furlans ma salacor “efevugjins” o “friulvignesiejulians”. Une volte la peraule “furlan” e deve onôr, cumò a chescj siôrs ur da dome vergogne.
◆ A chei che si iludin di cjatâ a çampe une sensibilitât plui alte pai valôrs de identitât e de diference, ur baste cjalâ i prin ats de zonte De Toni a Udin par fâsi colâ i braçs. No dome si tas su la denominazion dal Stadi Friûl che dopo jessi stât vendût par agns ae Dacia cumò al varès di jessi batiât, in spiete dal prossim sponsor, cu la anonime dizion “Udinese Arena”: ma si acete ancje, e cun braùre, di scancelâ il non de nestre tiere dal logo de plui grande manifestazion inventade intai agns come vetrine dai prodots e de ospitalitât di chenti. Il simbul al puarte une grande scrite “Doc” su la mape di dute la regjon: ma pe prime volte di passe 25 agns incà, il non “Friuli” al ven metût in bande. Sparît. Come une fantasime, tal cidinôr di ducj. Come che nol coventàs a nuie.
◆ Cheste regjon no je mai stade tant diferente tes sôs prospetivis. Une scarpe e un scarpet. Triest al cor, al à une direzion clare, un personâl politic che prin de militance politiche al cjale i interès de citât. Il Friûl al è çuet, sbrissât intal pantan prin di dut pe mancjance di cussience di chei che a varessin di jessi i siei sorestants: e alore a tornin tal cjâf lis peraulis di pre Toni Beline che tal 1996, su chest gjornâl, al visave: “fin che no cjatarìn politics che si sintin prin di dut furlans e che a sacrifichin o a condizionin la lôr parochie ideologjiche a lis esigjencis de lôr e nestre tiere, no podarìn fâsi grandis ilusions”. ❚