Une ostarie sperimentâl che e je daûr a nassi

Saressial miôr lassâi la Ostarie Furlane a doi triestins o a doi calabrês? Un ancestrâl moviment di stomi al sburte il gjestôr, che al à di abandonâ la ativitât, a molâ l’ambient ai calabrês, pluitost che ai triestins. Prime di dut pal fat che par lôr une tace di neri e sarès il cafè (cun dutis lis variants di gozzado e vie discorint), dulà che pai calabrês un neri (ancje se di Avola) al è simpri un tai di vin. E se chest nol baste, alore vie cu lis lezions di furlan! Dut par cirî une alternative a la possibilitât che a sedin i triestins a gjestî la Ostarie Furlane.
O stin fevelant di chel che ancjemò nol è un spetacul, ma il studi di un spetacul lât in sene sul palc dai Colonos intune clipe serade di Avost, dulà che la int presinte se no i è vignût un infart pes ridadis e vivarà ce che al covente par viodi la produzion complete. Frico e supprissata al nas di une idee di Luca Domenicali (chel di Microband) e Anna Menossi, e al à viodût une prime prove sperimentâl di chest Progjet Colonos te cort di Vilecjasse, jemplade di un public che al à rispuindut a manete. Andrea Bove e Enzo Lìmardi a son i calabrês e Claudio Moretti al è il furlan e a imbastissin un zûc a rotazion fra lis fissis e i lûcs comuns che a caraterizin lis dôs tipologjis di talianitât, par scuvierzi in ultin che no je tante diference. Ma, ridadis a part (e o spietarìn la version definitive de opare par esprimi cualchi considerazion sul spetacul), cumò nus interesse rimarcjâ un dai sot-tescj che a passin fûr vie: la cuistion dai furlans e dai triestins che, metude in zûc intune sorte di preordenât e orientât scandai fra il public di Claudio Moretti, no podeve rimandâ indaûr altri che une e une sole rispueste: miôr lassâi la Ostarie Furlane ai calabrês. Provìn par un moment a lassâ pierdi lis cuistion resintis che a àn puartât a dissezionâ il rapuart cui triestins (la cuistion de capitâl regjonâl, i invistiments finanziariis, e vie discorint) e provin a inoltrâsi par stradis inesploradis.
Mi soi impensât di ce che al diseve Michel Onfray incirche di altris archetips de mitologjie che a partissin de Gjenesi. Ducj si impensin de vicende dai doi fradis destinâts a la tragjedie, Cain e Abêl, ma pôcs a fasin câs al mistîr dai doi fantats. Poben, Cain al jere un contadin e Abêl un piorâr. Un al jere un omp leât a la tiere, vâl a dî un che al reste, l’altri un omp che si sposte cu lis pioris, vâl a dî un che al va. Lassin pierdi il motîf che al Signôr i a fat preferî la ufierte di Abêl ch’e à scjadenât la violence omicide di Cain (la injiustizie divine si je manifestade tantis di chês voltis che no vâl la pene di fermâsi: e somee masse a alc inventât dal omp par regolâ i siei conts terens), e provin a pensâ invezit a la rapresentazion simboliche dal mistîr dai nestris doi presumût vons (pal vêr di un sôl parcè che chel altri al è muart). La mitologjie dal om che al reste e dal om che al va si tradûs intune divierse vision dal mont. L’om che al reste al à il desideri di lidrîs, al cognos il plasê dal locâl e al à suspiet di dut ce che al è globâl. L’om che al va al brame la strade, lungje e cence fin, i va daûr a la scuvierte continue di alc di gnûf. A son doi monts a contrast e, cul passâ dal timp, a deventin il supuest teoric par dôs puestis in zûc: metafisichis, ideologjichis e politichis. Il cosmopolitisim dal viazadôr cuintri il nazionalisim dal contadin sedentari. Tropis voltis vino viodût o let de pôre che un popul sedentari, lidrisât, imobil come une statue, al à des novitâts puartadis dongje di un cercandul abituât a torzeonâ, a cori, a pierdi timp, a spassizâ, ma ancje a fevelâ in continuazion cu la int, cirint gnovis di semenâ ator? Cuant che l’om primitîf al à molât di jessi cjaçadôr e al à plantât la prime semence al è deventât contadin, cussì al à creât une plusvalence alimentâr che i à permetût di mantignî une vuardie che e stes atente al cjamp e un politic par direzi il borc e disponi une sorte di organisazion (alore e je nassude l’accumulazion capitalistiche e il control sociâl). Invezit l’om che al va no i sta daûr a cheste logjiche che e permet di convertî il timp in bês e la fuarce dai braçs in monede di aur, ma i va daûr ae sô autonomie, ae sô individualitât, nol à bisugne di un orloi e nancje di un cjampanili che lu visi dal timp che al passe e che i fâsi lassâ il cjamp cuant ch’e je ore. Par un omp che al va, il cjampanili al è un riferiment dal paisaç, un travuart di rivâ par ‘po spostâsi di une altre bande.
Chest, plui che un resonament sientific su la origjin dai contrascj fra triestins e furlans al è un zûc, un mateç vignût a flôr une gnot che un furlan al à preferît consegnâ la Ostarie Furlane a doi calabrês pluitost che a doi triestins. Ma seguitant daûr dai mateçs dispès no si sbalie tant. Magari cualchidun al viôt te emigrazion furlane la maledizion dal Signôr dopo che Cain al à copât Abêl, ma no stin a slargjâsi masse. Si fâs par ridi. Nol è nancje dit che i triestins a sedin dome viazadôrs… ❚
✒ Franco Marchetta