Sfuei Mensîl Furlan Indipendent
Archivi de Patrie

Puints 2013: la rassegne autunâl dal Istitût Ladin Furlansi vierç cuntune opare dedicade a pre Pieri Piçul

............

L’Istitût Ladin pre Checo Placerean al torne a presentâ la serie di incuintris clamade no a câs “Puints”, ven a stâi colegaments, no mûrs. Lu fâs cul intindiment di volê palesâ e fâ cognossi tocs di culture e di storie di chenti che i plui di nô furlans, magari cussì no, no savìn o no si visìn. La memorie no je la storie e o zonti che la storie no contade no esit parcè che passâts i protagoniscj, i fats, a restin i efiets, ma si cor il pericul di pierdi lis lidrîs di chel presint che si vîf. O vin sintût Gjeremie Gomboso segretarti dal Istitût par domandâi il sens di cheste serie di incuintris e in particolâr alc su la publicazion dal numar 17 de lôr golaine dedicade ai personaçs de autonomie furlane curade dal professôr Zuanfranc Elar. Un numar il 17 che al tabaie di pre Pieri Piçul, al secul Pieri Londar di Glemone. Un personaç che nol podeve no vê dedicade une opere monografiche su ce che al à vût fât pal Friûl e pal mont autonomistic. In struc cinc passaçs: fondadôr cun pre Meni Zanier di Scuele furlane che e voleve za tai agns ’60 tignî vive la lenghe insegnantle ai fruts; colaboradôr di Int furlane cun pre Checo, il grop che al varès vût di jessi subit dopo une des animis dal Moviment Friûl; un dai ispiradôrs di chel document unic in Italie che e je stade la Mozion dal Clericât tal 1967; une des figuris di riferiment de ricostruzion dopo dal taramot ta sô zone di Glemone; al è stât un di chei che a tacarin a voltâ tocs de Bibie cun pre Checo. A bastaressin chei ponts cardinâi par intivâ la impuartance da sô figure. Dut câs la iniziative di Puints, cun pre Pieri Piçul e à dome un dai siei moments. Di fat i apontaments metûts dongje a son trê: chel a pene ricuardât centrât su la figure di pre Pieri e su la Mozion dal Clericât che si davuelzarà a Glemone vinars 20 ai Setembar te glesie di sant Michêl dongje dal domo di Glemone aes 20.30; chel di domenie 22 aes 17.00 li de Academie Nico Pepe in Larc Ospedâl Vieri a Udin, dedicade al teatri e a la lenghe furlane; l’ultin apontament a Udin, miercus ai 25 aes 18.00 in sale Corgnali te Biblioteche Civiche “V. Joppi” in Rive Bartolini n. 5 e a al sarà dedicât al gjornalist Etelredo Pascul cul numar 18 de Golaine sul autonomisim. Apontaments impuartants che a coleghin storie e atualitât, sperant che a rivin a fâ passâ parsore a di chescj puints la cussience dal presint tune prospetive future. Par ogni informazion in plui: www.istitutladinfurlan.it ❚
✒ Redazion

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +