Sfuei Mensîl Furlan Indipendent
Archivi de Patrie

Une musiche folk par pierdisi tes stelis

Moira Pezzetta

Emma Gustafson, zovine cjantautore
italo-americane
nus presente i soi album

“Tantis oris o ai cjaminât, tantis personis o ai viodût. Tantis peraulis sbaliadis o ai dit, la mê lenghe e jere dificil di contignî. Tancj puescj dulà che o soi stade, tancj paîs che o ai viodût. Nol è altri che la ploie par lavâ i problemis di ogni vivent”.
◆ Cence nancje vê scoltade la cjançon, dome leìnt chest test poetic e malinconic o podìn percepî la melodie e la vôs di Emma Gustafson intant che e sune.
Nassude tra lis monts nevosis de Alaske tal 1994, Emma e je une zovine cjantautore che o vin l’onôr di vê in Friûl, e che si sta fasint cognossi in regjon e tal forest di cinc agns incà.
◆ Al atîf e à doi albums regjistrâts tal 2019, che a son une racuelte di ducj i siei componiments par inglês.
◆ Many an Hour, tradusût “Tantis oris” al è il titul dal prin album, che culì o vin ripuartât un toc dal test. Il secont album si clame Tales & Tunes from Towns & Hills Reviewed, o ben “Contis e suns di citâts e di culinis. Riviodût”. Dutis dôs lis racueltis a àn dentri dîs tocs, ducj par inglês.
◆ Tacant di frute, Emma e passe il timp a componi e a recitâ poesiis, a sunâ la ghitare e a bevi whisky di front des stue tai frêts de Alaske.
◆ A 12 agns, rivade in Friûl, dopo un viaç lunc in nâf sul Atlantic, si inamore de astrofisiche e de leterature inglese. O podìn dome imagjinâ cheste zovine Emma, cul cjâf tes stelis a componi sonets.
◆ Tal 2015 e ven introdusude ae Oasi Felice, il folk club di Udin, dulà che e scomence, fasint sintî al public la sô vôs e la sô ghitare. Cussì al tache il so percors musicâl, che in curt le puarte a esibîsi a la Girada e a fâ part dal Circolo Acustico.
◆ Pai studis e migre a Dublin, dulà che si specialize in leterature comparade tal antîc Trinity College. Culì e respire la atmosfere dal folk e des melodiis irlandesis, di indulà che e à simpri cjapade ispirazion. Si cjate spes a sunâ pes stradis e tai pubs straplens di Dublin, e si fâs cognossi di tancj, che ancjemò i stan daûr sui canâi social.
◆ A 23 agns e decît di tornâ a Udin, dulà che e insegne e e puarte ator lis sôs cjançons, acompagnade de ghitare acustiche e di tancj altris cjantautôrs che le cognossin e le presein pe bravure e pe spontaneitât.
◆ Emma e je simpri indenant cun gnovis colaborazions e concierts, dal vîf o in rêt. E propon diviers tocs dal so repertori par inglês ma ancje par talian. Ae fin dal Istât e à partecipât a Musica in Carnia, che o vês let tal articul de Patrie di Otubar.
◆ O podês comprâ i siei albums, in vendite su lis plateformis digjitâls come Spotify, e a Udin te Librarie Tarantola in vie Vittorio Veneto.
◆ Sierait i voi, scoltait Emma. O vignarês propietâts intun mont di poesiis, e si cjatarês a torzeonâ tra lis stelis cun malinconie. ❚

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +