Sfuei Mensîl Furlan Indipendent
Archivi de Patrie

None Lina che mi ten su

Floriana Bulfon

Cuant che i nonos a incoragjin i nevôts. Mê none Lina, classe 1926, e je a stâ a Peonis, o cemût che e disarès Stefania Sandrelli in Ci eravamo tanto amati, tal comun di «Trasaghis, no? Vicino a Peonis». Tresinte animis, pal plui anzians, e 250 bôçs pes âfs.

None Lina si è parade in cjase e l’unic mût par viodile par me a son lis videoclamadis. E à decidût che si fasin la domenie, di plui si secje. Dal schermi, jê si imerç intune Rome vueide di rumôrs. Cuarps di cjasis e arbui, lis retroviis di un paîs in isolament. E je curiose, none Lina, e fine intal domandâ spiegazions su chest virus che nus à spaurît. E e à di vê olmât su la mê muse i segns de pôre, parcè che invezit di dîmi che e sta ben, di fevelâ di se, si preocupe par me: «ti spieti cuant che al passe dut, cundut che vioditi al telefon al è biel, ancje se jo mi vuardi e o soi brute e vecje. Tu ten dûr che no ti train tant che in vuere”. Jê la vuere se vise ben. E sa ce che al è l’orari bandît, la fam, lis tessaris anonariis, e forsit i sune strani che vuê ducj a riclamin la vuere, ancje cui che nol sa ce che e sedi. O sin costrets a imparâ a vivi sierâts in cjase, a cjatâ un respîr gnûf devant dal virus che al è rivât cidin a insegnânus che no si puedin dâ par scontadis chês che a someavin abitudins, che nus oblee a rinunziâ aes nestris libertâts no par colpe di un nemì, ma par difindi la nestre vite. E scuvierzi chê democrazie e chel sens di comunitât cuant che un sacrifici individuâl al è indispensabil pal ben di chei altris. Di chei plui fragjii, propri tant che i nestris nonos.

Chei come none Lina, che e domande “Tu âs di mangjâ, no mo? Parcè che al sarès biel mandâti la crostade che e à fat tô mari. Cuant lu inventino un telefon par mandâ lis crostadis?”.

Un virus che par sparî al à bisugne de lontanance. Chê assence e devente cumò presince virtuâl in graciis di une rêt di celulârs che nus permet di restâ in contat e che forsit e coventarà ancje par jessi vuardiâts, alc che al sarà dificil di tornâ indaûr cence jessi cambiâts. ❚

 

Int di Cjargne / Magjie a Cjarsovalas

Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +

L’Editoriâl / Cuant vignaraie la “adunade” dai furlans?

Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +

Festival di Poesie Alpine / Autôrs di Ladinie, Grisons e Friûl a confront

Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +