Sfuei Mensîl Furlan Indipendent
Archivi de Patrie

Cassandre, residente in Lombardie

............

Cassandre, fie di Priam re di Troie, e jere une fantate tant biele che fintremai il diu Apol si jere inamorât di jê. Par concuistâle, Apol i veve dât il podê di fâ profeziis, ma jê no si jere concedude. La vendete dal diu e fo che Cassandre e les indevant a previodi il futûr, ma di chel moment che e ves la male pasche di no jessi mai crodude.

Diviersis a forin lis sôs profeziis su avigniments negatîfs futûrs, ma no forin mai cjapadis in considerazion; par esempli, chê di no acetâ a Troie il cjaval famôs cui vuerîrs nemîs.

Cuant che o leievi dal mît, mi maraveavi simpri de stupiditât di cui che no i crodeve, e la calcolavi tant che une flabe. Cemût jerial pussibil no aprofitâ dai siei amoniments par metisi al ripâr dai berdeis, o ancje dome par cualchi at di prudence?

Stant a Milan, un dai prins teritoris segnâts de infezion pal Coronevirus che si è difondude sedi in Italie che in Europe, o ai podût viodi trop che chest mît grêc antîc al sedi une metafore atuâl in ogni timp.

Di chi, o ai viodût ripeti i stes erôrs di bande di ducj chei colpîts dopo, e no son coventâts a nuie i amoniments e lis preieris che si à cirût di fâ. Prime e rive la sotvalutazion e la cjapade in zîr di cui che al à infets. Dopo a rivin i prins proviodiments, sburtâts dal alarme dai virolics. Dopo cualchi dì che i câs no cressin, viodûts i coscj economics des ordenancis, ve i varis “il teritori no si ferme” (a Milan e in Italie i “aperivirus”), e vie indevant. Ae fin, inevitabile, la esplosion dai câs cu la crisi de sanitât.

Cheste secuence dolorose, tal moment che us scrîf, e je daûr a sucedi in dut il mont, a dispiet dai apei dai Stâts là che il mâl al è rivât prime.

Cassandre: un virus che al viaze a pâr cul Covid-19. ❚

 

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +