La gnove che il Consei comunâl di Pordenon al à votât di sì ae jessude de citât dal teritori là che si metarà in vore la gnove leç regjonâl su la lenghe furlane e je ancjemò frescje e e continue a fâ discuti sui blog e sui gjornâi.
Par cirî di capî miôr cemût che si son davueltis lis robis te sentade dal Consei dai 07 di Lui stât, o vin fevelât cun Francesca Cardin, conseire di maiorance, elete te liste dal Partît Democratic, la uniche a vê pandût in maniere clare il so dissens.
SCATURIDE DE DECISION_ “Mi soi maraveade di jessi une dai pôcs conseîrs a no jessi in acuardi cun cheste decision presentade dal sindic, che o calcoli dal dut cence sens” e dîs la Cardin subit sul principi de nestre fevelade. Di fat, une des robis che il sindic Sergio Bolzonello nol à mai spiegât, cundut che i sei stât domandât di plui bandis, e je parcè che al à decidût di frontâ la cuestion in chest moment. “No jere nissune premure, no si capìs pardabon il parcè di cheste urgjence” e marche Francesca Cardin, “di fat la Leç regjonâl 29 cumò e je impugnade, si che duncje si podeve spietâ il parê de Cort Costituzionâl prime di cjapâ cualsisei decision”.
La sentade dal Consei comunâl e je stade pardabon “vivarose”, il fat che il sindic si sei refudât di ritirâ la delibare come che i domandave une part de maiorance che lu sosten, al à creât un clime une vore tirât. “Il sindic al è restât fer su lis sô posizions. Al à argomentât la sô sielte pontant soredut sul fat che la Leç e compuarte spesis masse altis pal Ent, e po dopo sul fat che Pordenon citât e je plui venite che no furlane” e spieghe la Cardin. E propit su chescj ponts si è basade ancje la sô contestazion, come che nus à spiegât tal detai.
UNE OPORTUNITÂT_ “Prime di dut bisugne simpri vê ben a clâr che si fevele di une Leç che e tutele lis minorancis, e che e varès di jessi considerade un valôr zontât, une oportunitât e no un pidiment. E je vere che i Ents locâi a varan oblics in plui, ma daûr a saran finanziaments di pueste, duncje no si pues platâsi daûr di une ipotetiche spese. Cun di plui no si pues dismenteâ che Pordenon citât e je cjâf lûc di provincie, si à di pensâ ancje ae sô funzion tai confronts di chei altris comuns”.
Lis peraulis de conseire a confermin che nissun si è ponût il probleme di ce che si lave a pierdi, in tiermins di oportunitâts e no di finanziaments: par esempli al à di jessi clâr che cumò nissune scuele dal comun di Pordenon e podarà vê i finanziaments previodûts de Leç regjonâl 3/2002 che e finanzie i progjets didatics in lenghe di minorance. Cun di plui nissun si è fermât a pensâ al risi di vê di tornâ ae Regjon i contribûts dai agns passâts. E ancje lis peraulis dal Sindic Bolzonello, ven a stâi pensâ di tornâ a jentrâ te zonizazion se la Leç e sarà cambiade, a àn pardabon pôc sens.
NO JE FINIDE_ Di bande sô Francesca Cardin no à nissune intenzion di lassâ pierdi cheste bataie, “O continuarai a dâ la mê poie aes azions par anulâ la delibare. O ai za sintût a fevelâ di une racuelte di firmis che e varà dut il gno supuart”.
Federica Angeli
_____________________________________
Sot de lint: la delibare in detai
Pordenon, adun cun altris 177 comuns de Regjon, e faseve part di chel teritori dulà che la lenghe furlane e je storichementri fevelade. Dai 7 di Lui stât però la situazion e je cambiade. Daûr des peraulis dal sindic, Sergio Bolzonello, Pordenon e jere stade metude dentri te aree furlanofone, fissade za de Leç Regjonâl 15/96, cence di une delibare de Zonte o di un vôt dal Consei comunâl. Su la fonde di chest e je stade presentade la delibare pe jessude de aree là che si metarà in vore la gnove leç regjonâl su la lenghe furlane (L.R. 29/2007).
Sore ae conseire di maiorance Francesca Cardin, dome altris 3 conseîrs a àn votât cuintri o si son astignûts: un dal Grup Mist, e i doi de Leghe Nord. Dut il rest dal Consei al à sostignût la propueste in maniere compate.
Leint la delibare a son diviers passaçs discutibii. Prime di dut dulà che si dîs che in dì di vuê dome une part une vore piçule di int e cognòs e e fevele la lenghe furlane, partant il pês de marilenghe al è cussì bas che no si pues valutâ l’impat dal fenomen. Si fevele a pont di une lenghe di minorance, e al è propit par tutelâle che e je stade fate une gnove leç regjonâl. Da pît de delibare daspò si lei che il comun al pant distès un grant interès a “partecipâ in maniere ative a ogni iniziative che e à il fin di favorî tal so teritori la promozion e la valorizazion dal patrimoni linguistic e culturâl furlan”… baste che dut al resti fûr dal edifici dal Comun!
Par cui che al à gust di lei il document, ve chi il link: www.comune.pordenone.it/comune/atti/delibere/prova2.html
F. A.
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +