Un progjet inovatîf, fat al larc di Lignan,
par contrastâ la crisi de pescje
Une serie di isulis artificiâls somerzudis par sostignî il setôr regjonâl de pescje e par fâ cressi la biodiversitât marine. A son i obietîfs principâi dal progjet “Upi – Unitât Produtive Itiche” ideât di Confcooperative Fvg, cuntune poie europeane di 570 mil euros, e rivât di pôc inte fase pratiche de sô realizazion. Di fat, si sta sierant la fase li che si poiin jù lis struturis sotmarinis a 10 metris di profonditât, a plui o mancul 3 chilometris al larc di Lignan, che a ufriran ripâr e vite pai pes, pai moluscs e pai crustacis dal Alt Adriatic. La porzion di mâr tocjade dal progjet – za monitorât prin, e che al larà indevant a jessi monitorât ancje intai prossims mês in colaborazion cun tecnics (ancje subacuis), esperts, il Cogepa Monfalcone-Trieste e la validazion de Universitât di Udin – e je di plui o mancul 800 etars, intune aree che Arpa Fvg e à definît cuntun stât ecologjic “bon”.
Pescje regjonâl in crisi
Un model inovatîf di gjestion de risorse e de pescje sostignibile dal pont di viste ambientâl, sociâl e economic. No si à di dismenteâ, di fat, il stât di crisi dal compart regjonâl, sedi par vie de riduzion dal pescjât (-74% a Grau e -54% a Maran, intai ultins 10 agns) che des flotis (-20%). Une crisi che e tocje massime la pescje artesanâl par vie de mancjance di risorsis itichis, de riduzion dai “nutritîfs”, dai cambiaments ambientâi e de invasion di organisims in competizion (granç blu, ctenofars e v.i.).
◆ «Favorî il ripopolament dai nestris mârs al vûl dî ancje dâ prospetivis concretis ae diversificazion des ativitâts che, tal avignî, a saran simpri plui impuartantis, tant che il turisim itic e lis ativitâts leadis ae gjestion de risorse mâr – nus dîs Ricart Milocco, president dal Consorzi Cogepa -. Par rispuindi aes sfidis che la pescje si cjate denant, e ancje par favorî il rinovament gjenerazionâl fasint in mût che la profession e sedi plui trative pai zovins, o volìn cressi il nestri protagonisim dentri de “blue economy”. I pescjadôrs a àn la esigjence di integrâ la ativitât tradizionâl di pescje cun gnovis fonts di redit. Progjets come chest no son duncje semplicis “infrastruturis”, ma a puedin pardabon fâ fâ chel pas intal futûr a dut il compart, dant continuitât ae filiere de pescje te nestre regjon, intai prossims agns ».
Lis piramidis sotmarinis
Lastris otagonâls di beton “naturâl”, a superficie ruspie, cun grandis busis circolârs, a costituissin la base pai modui assemblâts in maniere stabile a formâ 80 piramidis adatis par promovi la vite marine. Lis piramidis a saran “protetis” de pescje ilegâl a strassin di barieris di pueste posizionadis sul fonts. Cemût che si à dit, l’intervent al à l’obietîf di fâ cressi lis superficiis sotmarinis solidis cun scois “artificiâi”, otignint un efiet di ativazion de cjadene alimentâr e di agregazion. E cressarà cussì la presince de popolazion itiche, soredut locâl: brancins, oradis, ombrinis, cieui, sardonons, saradelis, sûrs. Inte aree di mâr cjapade in considerazion, la ativitât di pescje e vignarà fate in mût sostignibil, in graciis di un regolament prontât dal Cogepa, verificant in maniere fisse il numar e la cualitât dai prelêfs. La fase realizative dal progjet e finirà intal Novembar dal 2023, ma i siei efiets si viodaran intai agns futûrs. ❚