Sfuei Mensîl Furlan Indipendent
Archivi de Patrie

Une balade pe liende partide di Secuals e rivade insom dal mont: “Oggi è sabato sera” dai Leuq e Maurizio Mattiuzza

............

Pe prime volte insiemi lis peraulis vivis de poesie a incuintrin lis notis folk, blues e gipsy par ricuardâ une liende furlane. Cul test dal poete Maurizio Mattiuzza e la musiche dai Luna e un Quarto, e je jessude la cjançon Oggi è sabato sera: ballata per Primo Carnera.
Il plui voltis premiât poete e il grup dai siet di Muçane, vincidôrs dal Premi Friûl (2010) e di Suns (2013), a son vignûts fûr cuntun gnûf lavôr che al conte la vite dal lezendari pugjil di Secuals.
LA IDEE
Dut al scomence di une idee di Mattiuzza di contâ personaçs che a àn fate la storie dal Friûl, e viodude la sô passion pal sport al decît di dedicâ il so timp a Carnera. “Scrivint dal campion, lis peraulis si fasevin sot come une cjançon, tant che a jerin za prontis par fâ une balade, cui elements che plui a caraterizin cheste forme poetiche: dal lâ sù, al mît, fin a rivâ ae colade”. Al è cussì che Mattiuzza, che al dîs di vê une grande sintonie culturâl e umane cui Leuq, ur domande di musicâ lis sôs peraulis.
Il test “vîf, vocatîf, che al ricree emozions e circostancis” – nus conte Jacopo Casadio, vôs dai Leuq – al fevele di Primo, il personaç furlan che par prin al à vude une dimension internazionâl e che la sô storie e met dongje tancj temis diviers: dal Friûl ae Americhe, dal migrant, al pugjil e al atôr.
Primo al è soredut l’emigrant furlan deventât il simbul de storie di tancj di nô che a son lâts pal mont. E al è ancje su chest che i autôrs a àn voie di fânus rifleti. Carnera al è un simbul de necessitât di lâ vie, tipiche dai furlans di chei agns passâts ma ancje une storie contemporanie.
“O sin sigûrs che come Carnera ogni dì al è cualchidun che al partìs”, a àn scrit te buste dal disc.
OPERAZION LINGUISTICHE
In cheste balade, definide “noir”, e je stade fate ancje une operazion linguistiche. Il test de cjançon al è polifonic: par furlan, talian e, in cualchi passaç, cuant che a fevelin chei che a scometin, al è in inglês, tal slang dai imigrâts americans.
La cjançon e fotografe la serade cuant che Primo al piert il titul di campion cuintri Max Baer. Il combatiment che al rapresente la fin dal mît e de glorie di Carnera.
I suns insistents tant che pugns che a contin la biografie di Baer – Carnera e il suo pugno che batte come un maglio – a son intercalâts de musiche grâf e basse di cuant che al fevele Primo, sconfit, rivât insom de sô cariere di pugjil, e si sint ancje il toc di une vilote tradizionâl furlane che e ricuarde la partence viers un destin lontan – Cuant che jo o voi vie di culì, fin las pieras a vaiaran.
ROS… A’ND ROLL
Onorant i discs dal passât de grande tradizion rock and roll e par creâ un ogjet “vintage” cuntun contignût estetic significatîf, i autôrs a proponin la cjançon suntun vinîl colorât di ros. Tal lât B dal 33 zîrs e je ancje une gnove version, plui lente e blues, dal toc La stagjon de rosade, za presint intun vecjo album dai Leuq. Il disc, acompagnât de version in digjitâl, al è regjistrat sot de etichete Notecontinue.
Nol è di mancjâ aes prossimis presentazions de cjançon, dulà che i autôrs a ricrein un spetacul multisensoriâl cun tant di dissens, leturis, video inedits de vite privade di Carnera e si presentin in sene vistûts come tai agns Trente.
Par savê di plui su la band e sul poete, ma ancje par ciri i lôr prossims spetacui, visitait lis lôr pagjinis facebook: /mauriziomattiuzza?fref=ts e /Luna-e-un-Quarto-135571419817646. ❚
Moira Pezzetta

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +