Lis plêfs de Cjargne a son lûcs di preieris e di storiis antighis, pleris di secui sore lis culinis, teatris di esistence di un popul. Là si batiavin i vîfs, si soteravin i muarts e si cjantavin lis laudis al Signôr. Tieris batudis dai pas dai pelegrins, glesiis di mont, ancje se lis primis testemoneancis a van indaûr bielzà al cristianisim primitîf.
E je tante storie tes plêfs, a son tancj tesaurs, bielecis architetonichis, pitorichis, afrescs e altârs creâts cun art di mans artesanis, dai mestris cence non fin aes grandis firmis, tant che Domenico da Tolmezzo, Antonio Schiavi, Giulio Urbanis, Carlo da Carona.
Chestis plêfs a abracin disesiet secui di storie e a son – o a dovaressin jessi – un patrimoni inestimabil de umanitât, no dome de Cjargne e dal Friûl.
Al baste pensâ che a Dieç, sot de glesie vecje di Sant Pauli, a son stâts cjatâts rescj di un lûc di cult di etât augustee, precristiane, vâl a dî la plui antighe testemoneance di plebs rurâl in Italie.
LIS MAGNIFICHIS UNDIS_Undis plêfs fûr pe Cjargne, inte Val dal Tiliment, Val Dean e Val de Bût, dutis regjistradis intun elenc dal 1247 de Diocesi di Aquilee, cuant che a un ciert pont, par volontât dal Patriarcje Bertolt di Merania, la int e à dovût paiâ la decime pal lôr mantigniment, vâl a dî un decim dal salari. Tra dutis, la plêf di Dimpeç intitulade a Sant Denêl no à vude une vite lungje, assorbide di chê di Soclêf tor dal secul diesim cuart.
Tantis storiis, tantis liendis che si slungjin e che a sorevivin ancje tai timps plui scûrs, come tra i secui sest e novesim, cuant che la Cjargne e jere savoltade di ordis migratoriis e di ocupazions profanis dai lûcs sacris, come chê di chê che e jere la basiliche di Davâr. Là si conte che la tor cjampanarie e podarès jessi un rest dal cjistiel di Agrons.
Plêfs miscliçadis a struturis fortificadis, dulà che a son passâts fûcs e taramots; rescj romans, sacraris e relicuiis, cualchi plêf donade dal Patriarcjât ae Abazie di Mueç, ricostruzions e sistemazions di etât moderne, tante sugjestion.
SIMPRI VIVIS_O vivìn ancjemò lis plêfs e o continuìn la lôr storie, che e je la storie instreçade de lôr int e des lôr valadis, ven a stâi de nestre int e de nestre mont. Lôr a vivin midiant de preiere dai cjargnei e dai lôr plevans, intes celebrazions e fiestis religjosis, tant che la bussade des crôs a Sant Pieri di Zui, e ancje midiant di une schirie di propuestis culturâls e naturalistichis che a intindin valorizâlis. Un clâr esempli al è il Cjamin des Plêfs, un percors di vincj tapis che si pues fâ a pît o in biciclete, une trate che e vûl jessi un pelegrinaç, motîf di riflession spirituâl che al cjate il so moment plui cjalt cu la visite des plêfs, volint compagnâts di une vuide.
LA GNOT DES PLÊFS_A rindi plui vivarose cheste iniziative e je intervignude La lungje gnot des plêfs in Cjargne, une rassegne dute speciâl di musiche corâl a capele che e met dongje, intune sole zornade, dîs plêfs, dîs concierts e dîs degustazions di plats fats cun prodots dal teritori.
La prime edizion e je stade sabide ai 19 Setembar, par une lungje e tant frecuentade zornade, scomençade aes 14 inte Plêf di Sant Florean a Dieç, e finide a miezegnot inte Plêf di Sant Pieri a Zui.
La cualitât dai côrs che a àn eseguît diviers repertoris di musiche sacre a capele, intai rivocs des antighis arcadis des plêfs, inte pâs di chês culinis, tai savôrs e inte bontât de cusine cjargnele, ufierte ae fin di ogni conciert, a àn fat di chê zornade une rinassite corâl di fradilance, ducj dongje di une mense condividude.
Lis plêfs a tegnin vicine la int: al è il motîf che a son stadis costruidis in secui e secui di cambiaments, par tignî intate la fede e la comunitât. Cjatâlis vuê inmò frecuentadis e amadis, al è un grant e biel segn di sperance e di amôr. ❚
Alessio Screm
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +