Sfuei Mensîl Furlan Indipendent
Archivi de Patrie

Un viaç ae discuvierte de origjinalitât dal popul furlan

............

Intal so ultin documentari, Marco D’Agostini
al conte pre Gjilbert Pressac e la sô ricercjie

Un viaç ae discuvierte de origjinalitât dal popul furlan, in gracie dal lavôr di un studiôs che, doprant une metodologjie interdissiplinâr, al à puartât a slargjâ i orizonts de ricercje. Chest al è ce che “Incanto”, il documentari sul lavôr di pre Gjilbert Pressac, musicolic e storic, al à lassât a Marco D’Agostini, autôr e regjist dal video, une produzion Agherose.

D’Agostini, professôr a contrat di Regjie e Montaç video ae Universitât di Udin, al è un dai zovins documentariscj plui interessants in circolazion, za autôr di diviers cines, e al à intivât Pressac cuant che al lavorave par produsi il documentari
“I volti spirituali del Friuli”. In chê suaze nol podeve no vê a ce fâ cu la ricercje di Pressac che, tra i agns ‘80 e ‘90 dal secul passât, al à sfolmenât l’ambient musicologjic e storiografic dal Friûl, no restant dut câs sierât dentri dal ambient academic, ma rivant a comunicâ il gust di une storie origjinâl dal cristianisim in Friûl ancje ae int no studiade. Pressac al ipotizave che la fede cristiane e fos rivade a Aquilee no di Rome, ma di un trop di ebreus convertîts che a stavin a Alessandrie di Egjit, cognossûts cul non di terapeutis, che a vevin une lôr liturgjie particolâr dulà che ancje il bal al veve une part impuartante e che a vivevin in comunitâts di oms e feminis fûr de citât. Stant a Pressac, chest al puartà ae nassite in Friûl di un cristianisim vivût soredut in campagne e viert a une vision di salvece universâl.

«Jo no cognossevi Pressac e o soi partît scuasit dal nuie – al conte D’Agostini -, cussì il lavôr di svicinament ae sô opare al è stât lunc e al è avignût in graciis dal rapuart cun Luca De Clara, leint tal 2015 la opare omnie che lui al veve curât dai lavôrs di Pressac. Dal studiôs mi à colpît la sô capacitât di lâ fûr dai schemis de ricercje, fondantsi no dome sui tescj scrits, ma costruint ipotesis di lavôr cul lâ a cirî olmis sul teritori, intal paisaç, inte toponomastiche e intes espressions musicâls e cirint confermis sul cjamp aes sôs teoriis. Un secont aspiet che mi è restât dentri al è la sô capacitât di lâ cuintri lis sigurecis de cognossince par scuvierzi i elements di une identitât dal popul furlan che e à carateristichis particolârs come chê de rusticitas, che e met adun l’amôr pe semplicitât e pe vite in campagne cul rispiet pes culturis e cuntune grande rafinatece culturâl come che a testemonein lis carateristichis de musiche popolâr e sacre dal Friûl».

__

Ce imagjin dal Friûl vegnie fûr dal so documentari?

«Nuie di nostalgjic. O ai intervistât personis che a fevelavin di Pressac come se al fos ancjemò vîf e chest nus fâs capî la atualitât dal so pinsîr. Lu ai viodût ancje ae prime proiezion dal documentari (un miâr lis personis presintis a Aquilee) dulà che o ai incuintrât tante int interessade a aprofondî i temis des ricercjis di Pressac. O soi restât a scuvierzi che a son tantis lis personis che a àn cognossût il studiôs e che a son interessadis a imparâ e a pandi la storie dal Friûl, che e je une vore peade ae storie di Aquilee che tancj no cognossin e che invezit e da sugjestions grandononis».

__

Il biel di Pressac al è che al proponeve tesis inmagantis e, ancje se no si è sigûrs che a sedin veris in maniere sientifiche, al è biel crodi a chês teoriis.

«Lui al proponeve une tesi, se al jere cualchidun che al intindeve di dineâ lis sôs tesis lui al jere content, al jere viert al confront par amôr de veretât. Chest al è il spirt dal vêr ricercjadôr. Al è clâr che intal cine o presenti une clâf di leture, ma il video nol à une fin, al vûl stiçâ a une viertidure a ricercjis gnovis».

__

Ancje par chest, tal documentari al interviste une ricercjadore de Universitât dal Friûl, Emanuela Colombi, che e critiche il lavôr di Pressac.

«Mi someave just, pal aspiet inteletuâl, di proponi ancje une posizion critiche parcè che o savevi che il so lavôr e la sô metodologjie a son stâts criticâts. Cheste sielte no je plasude a plui di cualchidun che al preferive che o metès dome lis tesis dal studiôs di Turide».

__

E je une vore pressachiane la sielte di meti une seconde vôs, e je come il cjant dai terapeutis studiâts dal musicolic, che a cjantavin in doi côrs.

«Vere, ancje parcè che intun video di une ore no tu puedis pensâ di sierâ un discors sul lavôr di Pressac. Il film al vûl jessi dome une puarte vierte suntun mont di esplorâ».

__

Incanto” isal adat par jessi proietât intes scuelis?

«Sigûr, lu vin pensât cun cheste finalitât. Al è un lavôr fat par cui che nol cognòs Pressac, struturât soredut pai zovins: di fat o vin metût dentri dai slizeriments intune narazion che e conte di aspiets impegnatîfs de storie dal Friûl; o ai volût inserî dai tocs musicâi di Glauco Venier e de corâl “Candotti”, fondade di Pressac. Cun di plui o vin zontât une animazion che e conte dal viaç di membris de sete dai terapeutis di Alessandrie di Egjit fin a Aquilee e che, secont Pressac, a varessin puartât il cristianisim chenti. O crôt che la cognossince dal lavôr dal studiôs e puarti a une cussience plui fuarte de nestre identitât e che cheste e varès di puartâ a une cognossince des altris culturis e, duncje, a une viertidure ae diversitât».

D’Agostini e la cjase di produzion Agherose a stan za lavorant pe proiezion tai istitûts scolastics dal Friûl te prossime sierade. Cun di plui si previodin ancje jessudis sul teritori a scomençâ probabilmentri dai lûcs leâts a Pressac: Sedean, Codroip e Udin. Par savê di plui si pues cjalâ inte sezion “Eventi” dal sît de Forum (www.forumeditrice.it), la cjase editore che e distribuìs il documentari.❚

Marco Tempo

Int di Cjargne / Magjie a Cjarsovalas

Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +

L’Editoriâl / Cuant vignaraie la “adunade” dai furlans?

Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +

Festival di Poesie Alpine / Autôrs di Ladinie, Grisons e Friûl a confront

Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +