Prin di fotografâ la situazion di Gurize e dal so teritori intai prins decenis dal secul XIX al è une vore util ricuardâ, a grancj trats, il panorame politic daspò de burascjose esperience napoleoniche. Ancje se la Contee e jere sorevivude, la cjase dai Asburcs e inaugurà un gnûf cjapitul.
◆ No dome si tornà a segnâ un grum di confins tantis voltis in pôcs agns, ma ancje l’antîc Sacri Roman Imperi si dissolvè, tal 1806. Il so puest al fo di fat cjapât di un gnûf Stât, che cumò al cjalave plui viers Est e viers Sud: al jere nassût ce che o podìn finalmentri clamâ, cence il risi di creâ ambiguitât, Imperi austriac.
◆ Il Gurizan, dopo jessi stât pardabon anetût al Imperi francês come part des Provinciis Ilirichis, par cualchi deceni nol fo plui tiere di frontiere. Cu la jessude di sene dai Dôs e la creazion dal Ream austriac dal Lombart-Venit, la Contee si cjatà a confinâ dome cun altris distrets imperiâi. In mût specific, come une matrioska, e jere cjapade dentri te Provincie dal Litorâl (l’embrion de future Vignesie Julie), che a sô volte e jere part dal artificiâl Ream de Ilirie, esistût fin ae metât dal secul e che al veve il so baricentri te Slovenie di vuê.
◆ Ancje se a forin cjapadis sù lis ex isulis feudâls venezianis, retificâts i confins (soredut te Basse), e cuistâts impuartants centris urbans come Monfalcon e Grau, la Contee e finì par jessi margjinalizade da pont di viste economic. Chest al capità soredut par doi fatôrs. Il prin al jere leât in maniere direte ae politiche francese sparide di pôc, che e veve dât prioritât al disvilup nazionâl sore di chel dai teritoris invadûts. Il secont al fo invezit un fatôr interni dal stes Imperi: la cressite inarestabile de citât portuâl di Triest, che e deventà ancje la sede di un dai doi guviers dal Ream de Ilirie – chel altri al jere a Lubiane.
◆ Par prionte, “I agns 1816 e 1817 si segnalarin purtrop pe ecessive miserie e pe fam che e jere gjenerâl […]”, cemût che al à ripuartât Josef Domeni Della Bona tal Sunto storico delle principate contee di Gorizia e Gradisca (1853). Il riferiment al è ae cjaristie catastrofiche che e colpì la plui part dal mont dopo la eruzion dal vulcan Tambora, te Indonesie. Pal Friûl la pierdite demografiche e fo enorme, tant che e passà chê causade di dutis dôs lis vueris mondiâls metudis adun.
◆ Forsit dome la culture e la art a someavin no clopâ, lant anzit a confermâ la lôr anime austriache. La istruzion e fo potenziade cu la viertidure di scuelis superioris a Gurize, Gardiscje e Monfalcon, biel che tal ambit de piture si fasè cognossi il neoclassic Josef Tominz, “gurizan zovin e di grandis sperancis, e dotât di talents rârs […]”, come che al fo scrit tal periodic Diario di Roma intal 1814.
◆ Ma “Il malcuiet Votcent” – cussì clamât dal storic Sergio Tavano, che al è muart l’an passât – al veve ancjemò tantis sorpresis in program, e la Contee e jere daûr a jentrâ inte sô fase finâl, cul Risorgimento talian pront a messedâ lis cjartis une altre volte. ❚
Un recupar dificil
Enrico Rossi
