Invier plui cjalt de medie

L’ultin Invier meteorologjic, lât indenant dal prin di Dicembar dal 2025 ai 28 di Fevrâr dal 2026, al è stât une stagjon cjaldone par dut il mont, no tant che i Inviers dal 2022-2023 o 2023-2024, ma al è paragonabil a chel dal 2019-2020, cuntune temperadure di plui di 0,5°C plui alte de medie 1991-2020, rote dome di doi moments frêts (ma istès parsore de medie) inte seconde part di Zenâr e ae fin di Fevrâr. La situazion des temperaduris sul Friûl e je stade avonde in linie cun chê mondiâl.
◆ Intal mês di Dicembar l’anticiclon al à dominât salt, cu la ecezion di precipitazions debilis tra 1, 2, 17 e 21 dal mês e buere ai 3, 4, 23 e 24. Lis temperaduris mediis a son stadis plui altis di 2,5°C rispiet al 1991-2020 e ai 13 di Dicembar si son regjistrâts records pal ultin deceni intes temperaduris massimis dal mês a Udin (Sant Svualt), 18,3°C, e Pordenon, 16,6°C. Intes fasis anticiclonichis si son dâts la volte moments di inversion termiche, cun criùris inte planure (ai 15, di buinore, si è rivâts ancje a -8°C inalgò), e fasis cjaldis lungjis sedi adalt che tal bas. La nêf e je stade scjarse, la neveade plui bondante e je rivade jenfri i 24 e i 25, cuntun ingrumament massim su lis pistis di 25 cm a Sauris e sul Plan dal Cjaval. Daspò dai 26 di Dicembar il timp al è tornât seren ma lis temperaduris a son ladis jù, regjistrant ancje cualchi record negatîf pai ultins dîs agns (Glemone -6,6°C, Pordenon -5,2°C, Gardiscje -5,5°C, Monfalcon -4,0°C).
◆ Il mês di Zenâr al è stât inte norme climatiche, cuntune temperadure medie jenfri i 3 e i 4°C inte Plane. Dut câs, la prime part dal mês e je stade pardabon frede, cun temperaduris in mont (par esempli a Fusinis) jenfri i -10°C e i -20°C plui di cualchi volte e temperaduris mediis di 2°C plui fredis de medie 1991-2020. La seconde part dal mês, invezit, e je stade in gjenar di 1°C parsore de medie, cun records di cjalt pai ultins dîs agns in tantis zonis de plane ai 17 dal mês (Talmassons 16,6°C, Bicinins 16,6°C, Gorc 16,0°C, Palaçûl 17,3°C, Pordenon 16,1°C, Vivâr 16,5°C, Fossalon 17,1°C). Ai 5 e 6 di Dicembar su Cjars, Triest e Marine e à soflât Buere scure, e al à molât jù ancje cualchi centimetri di nêf. Sul Cjars e je stade vereade (ploie che tocjant par tiere e glace) jenfri i 9 e i 10 dal mês. Precipitazions significativis a son rivadis dome cui 24-25, cul passaç di doi fronts ocidentâi, e ai 28, cuntun altri front, e a àn puartât passe mieç metri di nêf dai 700 m insù su lis Alps e dai 1000 m insù su lis Prealps, cun pontis di 1 m su la Cjanine, che e je stade par chest l’unic lûc cuntune coltre di nêf normâl, scjarse inaltrò.
◆ Fevrâr, preâ Signôr, al à dreçât il belanç di precipitazion de stagjon e ancje chel nivologjic in cuote. Vie pal mês, il passaç di fronts atlantics diferents al à menât dongje nêf bondante parsore dai 1500 m e la coltre di nêf si è puartade in medie. Ogni tant al à neveât fin a 500 m. Al à plovût e neveât dai 3 ai 7, dai 11 ai 13, dai 14 ai 18 e dai 19 ai 24 dal mês. La neveade dai 19 di Fevrâr e je stade la plui bondante. Ai 4 e 5 su la cueste e je stade aghe alte, inte ultime fase perturbade a son stâts cavalons a Lignan e Grau. Par cuintri, al à fat a man a man plui cjalt dulinvie pal mês, cui prins dîs dîs di 1°C plui cjalts de medie dai ultins dîs agns, i seconts di 2°C, i tierçs di 2,5°C. Rispiet ae medie 1991-2020 lis temperaduris di Fevrâr a son stadis di 3°C plui altis, cun record di cjalt par Fevrâr a Pontebe, 18,9°C di massime ai 27 dal mês. ❚