Un “Premi Friûl” in sachete

Al è tal 2002 che intune cjanive di Vilalte di Feagne a nassin i Parafangos, vincidôrs dal Premi Friûl 2004. Come che si definissin, un tic sparniçâts: Luca ae vôs e ghitare, Alan ae ghitare e Daniele “Dilo” al bas (ducj e doi di Bresse di Cjampfuarmit), e a lôr si zonte Simone (di Prissinins) ae batarie.
«Cuant che, tal 2003, o sin stâts notâts di Radio Onde Furlane, la nestre “produzion discografiche” a consisteve intun unplugged regjistrât intune fieste a cjase di amîs. Dopo 14 agns al è ancjemò cussì: prin di regjistrâ i tocs ju sunìn dal vîf une vore di voltis, cussì cuant che ju regjistrìn la int ju cognòs za.»
A Cussignà, tal Entropia Studios, il grup al à regjistrât i siei prins doi discs, Sgrasai (2005) e Ti Cjali Di Fûr (2007).
Daspò a àn regjistrât Content (2011) ai Great Balls Studios a Paulêt, un e.p. Brutleg (2013) al SAE di Lubiane, e par finî Alc E Ce (2015) ai Artesonika Studios a Pordenon. ❚
✒ M.P.