Cul finî dal Istât al torne a sdrondenâ lis campagnis furlanis il rock ribel dai Parafangos: i cuatri amîs «Sglavinâts e imberlâts come doi parafangos tonâts».
Intune epoche dulà che i tocs dai discs a sunin ducj compagns, i Parafangos, dal 2002 a cumò, a rapresentin ancjemò la ribelion cuintri chê che e je la tradizion musicâl furlane. Tancj dai lôr tocs a àn fat la storie e i plui preseâts a son: Cence plui colôr e No tu sâs ce che tu mangjis, Eva, Slargje ben, El viaç e par finî Uomo terribile, la uniche cover e l’unic toc cjantât par talian, un funky dai agns ’60 che al fâs simpri movi la int! I lôr concierts a son spetacui che a durin dôs oris, cun proiezions video, senografie, musiche fuartonone e tante ligrie. «No si viodìn propit come “rocker maledets”». O volevin cjantâ par furlan cence sunâ folk, o cence scugnî striçâ il voli ae tradizion. «Cuant che o vin scomençât, tal 2002, ben pôcs grups a vevin cjapade cheste strade prin di nô (Inzirli tal punk, DLH Posse tal hip hop, e pôcs altris). Al inizi e je stade dure fâsi cjapâ seriementri, parcè che un grup che al sunave rock e hard rock par furlan al someave une barzalete. Cumò invezit dut chest nol è plui cussì stramp e un piçul merit al è ancje nestri. O savìn ben che se o vessin metût dentri une armoniche chi, un violin là, magari o saressin stâts plui “vendibii” ator pal Friûl, ma no jere la nestre vene».
Il lôr ultin album, jessût tal Novembar dal 2015 al è Alc e Ce. Il titul, come che nus contin, «al è vignût fûr adun cu lis cjançons. Di fat “alc e ce” al sunave ben e ancje i tocs a sunavin ben, e il titul al deventave simpri plui apropriât. Dispès si dîs “al è alc e ce” fevelant dal mangjâ, e nô o sin ducj amants de buine taule».
De vitorie dal Premi Friûl, tal 2004, il grup al è cressût ancje dal pont di viste musicâl: «cuant che tu scomencis tu varessis voie di meti dut il mont in ogni cjançon, mil cambis, mil riferiments. Planc a planc però tu tachis a curâ un tic di plui la identitât di ogni cjançon, e tu ti acuarzis che a voltis “di mancul al è di plui”, come che a disin i inglês».
Ducj i tocs dai Parafangos a contin une storie divierse: «Une sere o fasevin provis, e al rive un messaç anonim tal telefonìn di Luca: “Felicemente è nato Mario!” Ce podevial fâ Luca? Al à dit “content lui!”. Di chi o sin lâts indenant a sunâ. Cussì e je nassude la cjançon Content Lui. Slargje ben, al è il nestri prin video (lait a viodilu su Youtube!), al conte di Gigetto, che al jere il gjat di une nestre amie: puarin, al jere vecjo e vuarp e al faseve i bisugns un pôc dulà che al capitave, ancje sore dal liet. Il paron i diseve “mi racomandi, Gigetto, slargje ben eh!”. In te cjançon cheste storie a je deventade la parodie di un ciert gjenar di int». Dispès i tocs dai Parafangos a cjantin dai nemâi come metafore de int.
Il lôr ultin album Alc e Ce al ten dentri 12 tocs, cetant strambalâts, ironics e fuartonons.
«Par comprâ il disc si “scugnarà” vignî ai nestris concierts! No stait a pierdi il nestri bancut dal merchandising: tra maiutis, grumâi e gadgets. Un “Alc e Ce” insome» Par savê di plui sui Parafangos e i lôr concierts, tignît di voli la pagjine Facebook o scrivêt a parafangosofficial@gmail.com. ❚
✒ Moira Pezzetta
Lenghe minoritarie / FluxJudri25 – Giassico
Redazion
Conferece “Lingue minoritarie: le capitali della cultura e il rilancio del territorio” . A son intirvignûts Elena Gasparin, Dree Valcic president de Clape di Culture Patrie dal Friûl, Eros Cisillino president ARLeF, William Cisillino diretôr ARLeF, l’On. Guido Germano Pettarin e il coletif Lis Tarlupulis. FluxJudri25.Ca sot l’intervint di Valcic. lei di plui +
L’EDITORIÂL / Un Friûl disarmât
Walter Tomada
Lant ator pe Italie dispès al capite, cuant che si dîs di jessi furlans, di cjatâ int che nus dîs “Ah, mi visi dal Friûl! O ai fat il militâr a Udin!”. Prin dal taramot, un abitant su dîs chenti al jere un soldât e cheste ereditât di “tiere di primulis e casermis” se puartìn […] lei di plui +
Contile juste / Plebissît pustiç
Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +
Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane
Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +
5 Par mil / DANUS UNE MAN
Redazion
5 PAR MIL – Ancje chest an, cu la declarazion dai redits tu puedis dâi une man a La Patrie dal Friûl, il mensîl dut in lenghe furlane dal 1946. Nol coste nuie, baste meti il numar 01299830305 te casele juste: Sostegn dal volontariât e des altris organizazions no lucratîvis di utilitât sociâl, des associazions […] lei di plui +
Cungjò / Mandi, Bruno.
Redazion
Al declarave “che nol è dificil fâ telecronachis in marilenghe e che il furlan al à peraulis e espressions di pueste par fâlu”. lei di plui +