Par simpri Trio Pakai. Dopo Amato, ancje Gjenesio nus à lassâts. Ma il Trio al reste eterni | Il miôr de lôr discografie | Un ricuart

Al è stât il prin grup folk furlan a vê sunât, no dome par ogni cjanton dal Friûl, ma ancje in tancj paîs e citâts d’Italie, Europe, Afriche, Canadà, Americhe, metint ligrie tai Fogolârs furlans sparniçâts pal mont. Al è stât ancje il prin trio furlan a incidi un 45 zîrs, regjistrât tal 1972 a Radio Capodistrie pe cjase discografiche SAAR di Milan. Propit in chel an al è nassût ancje il non dal grup, che al meteve insiemi Amato Matiz ae armoniche, Gjenesio Puntel al liron e Paolo Morocutti ae ghitare. I prins doi di Cleulis e il tercet di Trep di Cjargne, a son deventâts adun il Trio Pakai. Plui indenant, intal 1976, si zontarà un altri amì ae vôs, Stefano Paletti, cjatât par câs intune sagre a Resie. Cussì e je tacade le aventure.
A son passâts 40 agns di chê volte, ma il mît dal Trio Pakai nol mole e nol molarà mai, ancje se Amato “Pakai”, il diu de armoniche, nus à lassâts 31 agns indaûr e Gjenesio, il diu dal liron, ai prins di Avost di chest an, ae biele etât di 92 agns, sunâts fin su l’ultin. La nomee dal grup e esist no dome tai ricuarts di cui che ju à scoltâts, cognossûts, balant lis lôr musichis, ridint e scherçant cun lôr, ma ancje di bande di cui che, passionât di folk e storie furlane – e no mancjin i zovins -, al cjate tal Trio une anime e un sintiment cence parie. Su internet, par esempli su Youtube, lis lôr musichis e vegnin scoltadis, scuvierzudis e sunadis di miârs di personis di ogni bande dal mont. Al è stât fintremai inmaneât un concors internazionâl in lôr onôr.
Inte lôr lungje storie, si contin centenârs di concierts, in sagris, fiestis e salis di ogni sorte, partecipazions a trasmissions televisivis, come pe Television Canadese, pe RAI, dulà che a àn fat la lôr aparizion intal prin cine in lenghe furlane dal titul Maria Zef. A ogni mût, la cove abituâl de domenie, cuant che no vevin impegns, e jere intal storic Bar Pakai di Cleulis. Propit li e je nassude la sureâl storie dal Fischiosaur, une des tantis: une sorte di mostro mieç dinosaur che al balinave sivilant des bandis di Timau. Une storiute par ridi che i àn crodût in tancj, une “pakaiade” che si è meretade fintremai la prime pagjine de Domenica del Corriere.
Primevere in cjargne, Sagre di paîs, Valzer di Pakai, Baronadis, Fantastico gaithal: si podarès lâ indenant a lunc cu lis lôr cjançons e baladis, che a son la plui sclete testemoneance dal spirt musicâl cjargnel di savôr popolâr. Ispirade dal sloven Slavko Avsenik, da la musiche clamade “Oberkrainer”, da la “Alpenmusik”, da la melodie taliane e dal snait dal mitic Peppino Principe (al è lui che i à regalât a Pakai la sô prime armoniche Excelsior), la vene musicâl dal Trio Pakai e je uniche, par vie di un ingredient preziôs: la furlanetât.
Di lôr NO nus reste dome la musiche, ma ancje tancj ricuarts: ridadis, baladis, discs, fotografiis. Dutis chestis robis e tantis notiziis, lis podês cjatâ inte Cjase Museu sul Mont Moscart dongje Paluce, curât de famee di Amato Matiz, e in tun libri preziôs, scrit di Celestino Vezzi dal titul Amato Matiz Pakai, un om e la sô armoniche, publicât dal Circul Culturâl Ricreatîf di Cleulis. Une storie, chê dal Trio, che e merete di vivi par simpri. Come che al dîs il sproc: «Îr, vuê e doman, par simpri Trio Pakai». ❚
✒ Alessio Screm

______________________________________
Il miôr de lôr discografie
Al è dificil scrivi une discografie complete dal Trio Pakai. Tacant dal 1972, a àn regjistrât cinc 45 zîrs, cuatri LP e ancje tantis musicassetis. Dispès chestis regjistrazions no vevin un titul precîs: o il non dal grup o chel des cjançons presintis. Stant che i lôr tocs a son stâts ducj riproponûts tai LP, si limitìn a nomenâ chescj. Il prin al è jessût pe cjase discografiche A.V.F. di Nimis, intal 1976 e si clame Allegro Friuli. Il secont, dal titul Anin,varìn fortune, al ven fûr tal 1977 pe stesse cjase. Il tierç, Baronadis, intal 1979, simpri regjistrât a Nimis. L’ultin, Gotis di ligrie, al ven fûr pe Promodisc di Tarcint intal 1982. Dute la lôr musiche e je stade metude su CD di bande de Promodisc inte antologjie Musiche e canti friulani, cuntune sezion di trê compact disc dedicade al Trio, dal titul Trio Pakai volume 1, 2 e 3. ❚ ✒ A.S.
______________________________________
Un ricuart
Par ricuardâ Gjenesio Puntel che a nus à lassâts di pôc, o ripuartìn une storie, gjavade fûr dal libri di Celestino Vezzi, contade al autôr de vive vôs di Gjenesio. E à par titul Gjenesio nol vûl lâ in LA. La presentìn cemût che e je stade scrite, inte variante di Cleulis.
(Gjenesio) No sai dulà ch’i èrin ma i sai che la musiche a ere in FA e jò inveze i fasevi un’âte note. Amato al si ere indacuart e cussì, intant ch’al sunave, al mi vosave daûr: «Va in LA! Va in LA!» E jò denti di me no capivi, i cjapavi il bas e mi spostavi simpri plui in là. Tun moment, a fuarce di lâ in là, no seo colât jù dal palco?!? Fermade la musiche a sec! Jò mi volti viers Amato e j vôsi sù: «Cjòmò! Tu sarâs content! Cumò sarai ben lât in là avonde!».
Un’âte volte a Raussêt al è sucedût un fat imò pieis. Jò i ài il vizi, par fâ un poucje di scene, di dâ ogni tant un tec al bas, lu fâs pirulâ e dopo lu torni a cjapâ al volo e i continui a sunâ. ❚✒ A.S.