Pre Josef Marchet, cjalât di distance rispiet ae sô ete, al somee pardabon un inteletuâl dal Rinassiment rivât fintremai tal biel mieç dal Nûfcent.
Cun di fat, personalitât, preparazion e interès lu fasin une figure poliedriche cun visions sui problemis e capacitât di frontâju che a jerin inedits in chê volte e ancjemò di grant interès cumò. Indotorât te Universitât Catoliche di Milan, cuant che al tornà in Friûl al insegnà tal liceu dal seminari di Udin, po tai liceus Stellini e Bertoni e po al Percoto. Il fassiscj lu mandarin al confin, ma finide la vuere al tornà ferbint e, cun Felix Marchi, un miedi, al fondà tal 1946 il gjornâl La Patrie dal Friûl e al fasè di santul al grup leterari Risultive.
Al jere convint che la marilenghe si sarès salvade se e fos stade insegnade a scuele e, ancje par chest, si metè a fâ un lavoron che al publicà tant che Lineamenti di grammatica friulana, la sô opare plui grande dutun cul volum La scultura lignea in Friuli, che i critics lu considerin «fondamentâl».
Ma pre Marchet al preparà tancj altris “imprescj” par che i furlans no podessin dî di no vênt par coltâ la lôr identitât. Al publicà Uomini e tempi, ilustrazion critiche de vite e des oparis di 109 personaçs e notis su altris 773; al metè adun il materiâl che po al è deventât Le chiesette votive del Friuli, biel che su la Vita Cattolica al scriveve Lis predicjis dal muini, intervents li che no lis sparagnave a di nissun. Cun chei scrits ancje al compagnave, cirint di tignî tal troi che i pareve il plui just, une societât che tra i agns Cincuante e Sessante e scomençave a mudâ di corse ancje chenti. (A.L.)