L’alteRMiX quartet al è un progjet sperimentâl che al nas dal incuintri di musiciscj furlans cun diviers guscj e studis musicâi. Il lôr repertori al cres daûr dai guscj dai cuatri che a misclicin lis lôr melodiis e struments cun musiche popolâr e folk mondiâl. I alteRMiX quartet a dan vite a contaminazions musicâls, o ben rangjaments e tocs ALTERnatîfs e ReMIXâts.
◆ La formazion e la idee di sunâ insiemi e nas di une amicizie profonde, tal 2015, cuant che il grup si costituìs tra Udin e la Cjargne. A componilu Noela Ontani (flaut traviers) e Andrea Zampieri (clarinet) che a vegnin di studis classics, Federico Pace (percussions) al à une formazion moderne tra ska, rock e pop, invezit Giovanni Grisan (ghitare) al è un autodidate, che al à fat de versatilitât la sô marche di fabriche, dal pop al rock, dal baroc ae musiche tradizionâl. Te formazion iniziâl dal grup al jere ancje Nicola Siagri al violoncel, che cumò al è a Londre a studiâ musiche. Si son cognossûts intun cors di formazion musicâl di musiche terapie.
◆ Il grup al à partecipât tai agns a concors, festivals e a diviers events musicâi ator pal Friûl e in Italie. A jerin za al Folkest e chest an a son stâts tra i dîs grups finaliscj al Miela Music Contest. Si cjatin a fiestis e festivals internazionâi de musiche, ma ancje in version acustiche a sunâ sù pes monts de Cjargne.
◆ La lôr musiche e je cetant svariade e divertente. Il grup al sune un repertori che al va dal pop al rock, dal baroc ae musiche tradizionâl internazionâl, folk e popolâr.
◆ Tal Lui dal 2019 al jes il prin album dal grup cul non “AMX”. Un disc, disponibil sedi fisic che su lis tantis plateformis digjitâls, che al à za vût tantis recensions positivis. Tredis a son i tocs che i artiscj a àn decidût di meti dongje e che a cjapin ispirazion dai repertoris popolârs di dut il mont, cun particolâr preference pe musiche de tradizion irlandese, klezmer e musiche balcaniche.
◆ “AMX” al à dentri tocs tant che “Der Zug um 7.40 Uhr“, une balade che e rive de Ucraine e contaminade cun klezmer e musicalitâts dal Est Europe, come ancje “Eche ya” o “Agapimu fidela protini” intun rangjament origjinâl, cjançon che e rive de tradizion grika, “Lule lule“ toc de tradizion albanese, o altris de tradizion Macedone e dal Est Europe. Si zontin a chestis ancje melodiis plui incjalçadis dal folk irlandês tant che “The foggy dew“ o “The drunken sailor”.
◆ La regjistrazion dal album e je stade fate a Comelians, cussì come lis ripresis dal video di “Tamlin”, de omonime balade scozese.
◆ I alteRMiX quartet a son daur a realizâ gnovis ideis e progjets musicâi, ma ancje didatics. Par nomenânt cualchidun: a àn colaborât cun Dennis Vertucci pal so gnûf album “La mia logica” tal singul “Non sono solo io” e a sunin ator insiemi cul doi des Ladies’ Juke-Box fasint concierts interatîfs didatics, dulà che il public al pues partecipâ aes performances insiemi cui musiciscj.
◆ Dapardut e par ducj: la musiche dal alteRMiX quartet – unusual folk music – e je in evoluzion continue, cul obietîf di cjapâ dentri tancj stîi musicâi. O sin sigûrs che tai prossims agns o sintarìn tabaiâ di chest grup che al puarte la musiche dal mont in Friûl e il Friûl pal mont.
◆ Video e simpatichis curiositâts des lôr provis e concierts ju podês cjatâ su lis lôr pagjinis social. Par sta inzornâts e savê di plui su chest grup di ALTERnatîfs e ReMIXâts lait a scuvierzi il lôr sît: https://www.altermix.it/ ❚
