No si pues fevelâ di Milan cence fevelâ dal so Fogolâr storic, che mancul di un an fa al à vût di patî, magari cussì no, la muart dal segretari Marco Rossi, che nus à lassâts masse zovin. Al so puest lis brenis de associazion lis à cjapadis in man la vedue Fulvia Cimador. E propit Fulvia, pari triestin e mari di Fare, mi dîs di cemût che e à fat a tirâ indevant: «Marco al varès volût cussì, lu sai ben. E cussì cuindis dîs dopo che nus veve lassâts o ai volût che si fasès istès il “gustâ insiemi” de associazion a Nadâl. Duncje, si va indevant cun dutis lis ativitâts».
Par prime il cors di furlan, che si fâs di 20 agns. Al sarà ogni joibe di Zenâr a Jugn. Po dopo lis Setemanis de culture furlane che si fasin a Novembar. Ai 9, inaugurazion cun ospite la Societât Filologjiche Furlane e pe part musicâl Aldo Giavitto. Ai 16, fieste pai 50 agns dal gjornâl trimestrâl dal Fogolâr di Milan, fondât di Ardito Desio tai agns Setante. Ai 23, Patrizia Deotto, professoresse di slavistiche ae Scuele Superiôr di Lenghis Modernis di Triest, e presentarà la sô gnove traduzion di un libri dal rus.
Altri apontament, ai 14 di Dicembar, al è il “gustâ in compagnie” pai iscrits e pes fameis. Il gustâ dai 14 al ven tradizionalmentri prime de dì de Messe par furlan intal Domo di Milan, domenie ai 15.
Oltri a chestis ativitâts a ‘nd è altris vie pal an, come che e je stade la partecipazion ae scree de intitulazion di un zardin a pre David Maria Turoldo, o i apontaments estîfs organizâts in Friûl, profitant che tancj dai siei iscrits a son pensionâts e di Istât a tornin in feriis in Patrie.
A proposit de composizion anagrafiche dai iscrits, i domandi ae segretarie cemût mai che no si rive a coinvolzi di plui i zovins. «Prin di dut, Milan e je une citât frenetiche che no ti lasse masse, sì che duncje in tancj che a lavorin cumò a tornin in Friûl tal fin de setemane. Aromai Milan al è mancul distant: la funzion sociâl dal “tignîsi dongje tal forest” no à plui sens. E je ancjemò valide, però, cui anzians, e cun chei si va indevant. O sin simpri vierts a ducj, però, e a gnovis ideis». E a Milan, la citât plui indevant e ative, nol podarès no jessi cussì. ❚
Dree Venier
