Sfuei Mensîl Furlan Indipendent
Archivi de Patrie

UN FURLAN A MILAN. Dal “Stellini” aes termis a Porta Romana

............

No si disarès, ma Milan al à lis sôs termis, fatis sù di cualchi an e ancje cuntun bon sucès. Termis no leadis ae idee di vacance, ma tant che moment di vite e di relax di citât.
O ai fevelât di chest cun Marianna Mauro, zovine furlane di Udin, che dal 2017 e lavore li dal Grup QC Terme che al à in gjestion, cun tantis altris, lis termis di Milan QC Terme Milano a Porta Romana.
Daspò di vê fat il “Stellini” a Udin, Marianna e je vignude a Milan par studiâ economie, cun chê di fâ la comercialiste, ma «mi soi inacuarte, fasint il praticantât, che il lavôr no mi plaseve, e cussì cuant che une amie mi à dit che il Grup QC al cirive personâl o ai mandât il curriculum e mi àn cjolte».
Marianna si ocupe di direzion gjenerâl di gjestion, gnûfs progjets, e dal personâl «par dut il grup: o voi ancje ator pe Italie a viodi dai nestris stabiliments».
Mi fevele dal concet di termis dal Grup QC, che «al à gjavât miedis e infermieristiche, pontant al benstâ, al relax, ae socialitât. Plui che a di un benstâ dal fisic, si pense al benstâ spirituâl. In plui di saunis, idromassaçs e trataments variis, o vin ancje percors cui profums, zûcs di lûs e vie indevant. E di bon finâl, si pues fâ l’aperitîf, simpri in vieste di bagn».
E i milanês a àn preseât: «A QC Terme Milano, inviadis dal 2007, intal 2018 o vin vût 180.000 ingrès e i numars a son simpri in incressite. Aromai si pues dî che lis termis a Milan a son di mode: la etât medie e je di 33-35 agns e i zovins si fasin la foto sui social mostrant cun braùre che a son li».
Ce si pensial des termis furlanis tal tô “setôr”? «Si cognòs Darte, e dopo Grau, Lignan e Monfalcon, ma dutis pal aspiet curatîf. In Friûl e mancje une terme grande cul concet dal benstâ. Un aspiet che secont me ancje i furlans a cirin».
Cemût si cjatie “une furlane a Milan”? «Ben, e je une citât vivarose e plene di energjie li che no si stufisi mai. Al contrari, mi mancje la trancuilitât de vite a Udin e chel grant vantaç che si à a stâ là: che in mieze ore tu sês in mont o al mâr cence bisugne di organizâsi tant».
E alore, si capìs che stant a Milan par rilassâsi cence tant bacilâ… al tocje propit lâ aes termis! ❚

Dree Venier

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +