Sfuei Mensîl Furlan Indipendent
Archivi de Patrie

Un Eros eretic e profetic

Agnul Floramo
Pasolini sul set di Salò

In plui oparis il scandul si fâs cuarp, cjar e materie, sanc e sudôr

CJANT – L’Eros_La librarie di Pasolini, come dutis lis racueltis di libris che nus compagnin dulinvie inte vite, e va intindude tant che une colezion di emozions, dal moment che ogni pagjine che o leìn o che o fasìn nestre e je un sclese, un riflès dal nestri jessi plui profont, che al cjate spieli tes peraulis di un autôr, di un pinsîr o di une filosofie. Letôr rabiôs e critic, malât di une bulimie investigative cence remission, curiôs di lâ a sgarfâ jenfri lis bibliografiis che par solit a vignivin lassadis in bande de scuele e de academie, o fintremai condanadis de morâl borghese e catoliche che masse dispès si sentave su la catidre par judicâ cence capî, Pier Paolo al à fat di ogni opare amade une intersezion che à savoltât la sô cussience, stiçant intal profont ancje la curiositât di gnovis esplorazions e prospetivis. Di brâf eretic e bastiancontrari – dal sigûr nol jere un che al leve daûr de rubriche dai libris conseâts o di chei di mode! – al cirive jenfri lis peraulis dai siei autôrs chel inmagament che lu stranive, lant in cercje di emozions fuartis e profondis, universâls, supadis des plui diferentis tradizions culturâls a nivel mondiâl: il mont grêc e latin, i cjants orientâi, la Ete di Mieç, ma ancje i scritôrs “libertins” dal ‘700 o lis notis che la critiche psicoanalitiche e tacave a butâ jù suntun gnûf concet di leterature tant che espression subliminâl des pulsions plui profondis dal nestri jessi umans. O savìn ben ducj che il pas di “eretic” a “erotic” al è un lamp, e no dome par un zûc di letaris. E cussì, la eresie pasoliniane e passe ancje dentri di une sensibilitât erotiche fuarte che si manifeste no dome intai scrits, ma in forme ancjemò plui potente doprant il lengaç dal teatri e chel dal cine, là che forme, cuarp, cjar e materie, sanc e sudôr si fasin ancjemò plui evidents, e potenzialmentri scandalôs, che no l’ingjustri des peraulis. Cuant che si fevelarà di lenghe e di poesie no si podarà dismenteâsi che la “Academiuta” fondade a Versute tant che une des sôs primis e grandiosis esperiencis culturâls, e jere par Pasolini une cubie di Neoteroi. E il non, screât di Caius Valerius Catullus (84-54 p.d.C.), al voleve propit intindi chei poetis che a fevelavin di Eros intune forme gnove rispiet ae tradizion, ancje scandalose, ametint che chel diu potent al leve a pandi la sô energjie in chê fiere di amôr che e fâs sbrissâ lis stelis su la volte dal cîl, cressi la jerbe intai prâts, che e da il morbin aes bestiis e che e distane la passion tai umans, chê “taetra tetigo” che nus cjape studant la razionalitât e fasint di ogni amant une vibrazion cosmiche orgasmatiche e maraveose. Lis sugjestions de leterature a vegnin simpri cuinçadis ancje cuntune cognossince straordenarie de storie da la art, in particolâr chê de Rinassince, o chê violente e crude di un Sîscent violentât de lûs e de ombrene di Caravaggio, cuant che pitôrs e scultôrs a dopravin il cuarp tant che une topografie sensoriâl par esprimi potence o morbidece, plasê o dolôr. Mi pâr che lis visions erotichis di Pasolini a podaressin jessi pensadis in trê moments diferents, che ae fin si impastin intune intersezion fate di pulsions profondis e di visions che a cjapin la forme delirante di une calade infernâl simpri plui disperade e crudêl: il zûc, il misteri e la violence. Dal sigûr, la rileture dal Decameron di Boccaccio e des Contis di Canterbury di Chaucer nus sugjerissin che la sessualitât e cjape forme di un zûc maliziôs e legri, là che dispès l’om, rapresentât midiant di un cuarp zovin e cence esperience, al ven “iniziât” ae gramatiche dal eros e des sôs sensazions plui profondis de sapience feminine, che e sa ben cemût fâ sunâ chel glimuç di emozions che dispès i masclis no son bogns di interpretâ. Muiniis, putanis, cortesanis, feminis di alte cundizion o popolanis: dutis a son mestris di seduzion. Al è come se Pasolini al cjapàs sù e al savoltàs il sproc di Dante “voi donne ch’avete intelletto d’amore”, interpretant in forme etimologjiche profonde e salacor vere chel intelet tant che “intus legere”, ven a stâi tant che une capacitât di “penetrâ”, e no dome moralmentri, il cjâf e la cjar dal mascli. La grande tradizion orientâl invezit e sugjerìs il cidinôr dal misteri, la emozion di un sgrisul che al rive a pandi simbui che Gustav Jung al varès definît “archetipics”. Cussì “Il fiore delle mille e una notte” al devente cuasi un viaç oniric, là che la peraule e devente cjar: un eretic “Verbum caro factum est” poluzion noturne e spermatiche che si smamìs a pene che al monte sù il soreli de razionalitât. La tierce espression dal Eros e je dal sigûr la plui fuarte e scandalose: cun “Orgia”, l’autôr al va a esplorâ la gramatiche sadomasochiste fate di chês torturis e umiliazions che a deventaran ancjemò plui evidentis e crudis in “Salò. Le 120 giornate di Sodoma”. La perversion erotiche e devente un mût par condanâ la societât borghese, cu la sô ipocrisie disumanizante, incjarnade in maniere perfete di chê mentalitât fassiste che par Pasolini e somee jessi une part costitutive de societât taliane e globâl. Profetic, come simpri: la sene dai presonîrs tignûts ae cjadene come che a fossin cjans le varessin viodude ancjemò, magari cussì no, dal vîf, inte preson di Abu Ghraib, cuant che une soldade americane sadiche e zuiave cul so presonîr islamic. ❚

:::::::::::::::::::::::::::::::::::::::::::::::::::::::::::::::::::::::::::::

Plui danunzian che marxist

DISCJANT. Baste cjalâ lis fotografiis là che Pier Paolo Pasolini al ven incuadrât par rindisi cont de grande atenzion che al veve pe rapresentazion egotiche dal se tant che espression di un cuarp che al cir il gjoldiment. Come se la percezion maniacâl de sô fisicitât si fasès strument principâl di investigazion erotiche dal mont, là che dut al passe in secont plan rispiet al pont di viste esibizionist di un se che al glot il rest, considerant la visuâl di chel che al cjale cetant plui interessante dal pont di viste di chel che al ven cjalât. Cussì Pasolini che al zuie di balon nol è dal sigûr la prove – come che in tancj e continuin a pensâ – dal so jessi om di popul che al condivît la passion di un sport popolâr, ma pluitost un model che si mostre plui dongje a une sensibilitât danunziane che no marxiane: baste viodi cemût che si met in pose savint che cualchidun lu sta fotografant, sedi pandint i muscui, la piel, il sudôr sot di une maiute di sene, ben zimulade cui bregonuts e cui cjalçons, sedi cuant che al fâs cualchi tîr in puarte mascarât di inteletuâl, in gjachete di ordenance, bregons cu la plee e golarine di professôr in gjite cu la sô classe di students. Cheste prospetive erotiche estetizante e somee studiade ad art tant che intun copion, e al voli atent e critic no rive a fâ passâ la spontaneitât de intenzion. Cussì, sedi il vistît costôs e ae mode che il capotat sdavàs cul maion di lane, o pûr la rie ben petenade in bande e drete sul cjâf o l’aiar che al busine jenfri cjavelats masse luncs e sporcs, a cjapin la ande di une mascarade, di un travistiment, ma straordenari par rivâ a capî il sens dal eros par Pasolini. O soi cetant convint che par lui l’erotisim al fos prime di dut une forme inteletuâl, e duncje presuntuose, di “autoerotisim”, tal sens che il gjoldiment al veve di jessi prime di dut un mût par dâi sodisfazion al so plasê individualistic, che al bastave a se stes. Pasolini al jere il plui apassionât amant di Pasolini. Eros cussì nol devente lengaç, comunicazion, nancje critiche sociâl o trasgression cirude par creâ scandul tant che arme politiche di rivoluzion, ma une gratificazion banâl di chê pulsion personâl sublimade midiant dal lengaç de art; plui un pretest, o une scuse, che no une esigjence interiôr, no tant diferente, in fin dai conts, di cuant che si sint legjitimât a comprâlu, l’eros, trasformantlu intune marcjanzie sogjete al procès di alienazion, cence mai domandâsi se chei che lu vendin lu fasin par amôr o par necessitât. ❚

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +