Al scjât ai 27 di Mai il bant de Fondazione Friuli “Visins di scuele” che al jude lis scuelis a slombati cuintri un dai mâi plui pençs de societât di vuê, chê che e ven clamide “puaretât educative”. Si trate de mancjance des condizions che a permetin di davuelzi al miôr la istruzion dai students, sedi dai plui piçui che dai plui grancj. Par chest la Fondazion e met a disposizion un totâl di 10 milions di euros. Une cifre une vore impuartante par une mission decisive, ven a stai promovi la sperimentazion di scuelis di cualitât in contescj dificii pe dislocazion gjeografiche, come par esempli lis scuelis di mont, o pe composizion sociâl, come chês des perifariis di citât, chês cuntun tas une vore alt di fruts forescj o di disturps dal mût di imparâ. La selezion dai progjets e cjalarà ae lôr possibilitât di vê un impat positîf judant chei istitûts che a vuelin rindi plui atrative la lôr ufierte didatiche. Chest intervent al è impuartant soredut par ridusi lis difarencis tra scuelis che a marchin dispes ancje lis sieltis che a indreçin lis politichis educativis teritoriâls. Intun sfuarç dal gjenar al è impuartant lavorâ in rêt e par chest a varan plui valôr in graduatorie i progjets presentâts di plusôrs sogjets. In ogni câs almancul trê a varan di jessi i proponents: ogni idee e varà di vê la poie di almancul une scuele e dôs realtâts dal privât sociâl. ❚
FONDAZIONE FRIULI. La educazion si insiore cun “Visins di scuele”
