Sfuei Mensîl Furlan Indipendent
Archivi de Patrie

Friûlpoint, une bandiere dal Friûl

Walter Tomada
Michele Venier (foto Michela Nale)

Michele Venier, titulâr de Friûlpoint, nus conte de sô dite nassude fasint maiutis in lenghe furlane e che cumò e fâs tant altri, simpri puartant indevant la Patrie in Friûl e tal mont

un grumâl (foto Mariano)

O incuintri Michele Venier, il titulâr de Friûlpoint, te sede e laboratori di Lauçà. Un lûc net e ordenât, ma plen di colôrs e di creativitât: o viôt, cun di fat, maiutis e altris prodots tant che cjicaris, posters, felpis, magnetis… Ducj cun scritis e grafichis par furlan. La Friûlpoint e je une dite che fin dal 1999 e prodûs e e vent tancj materiâi in marilenghe, tacant de nestre bandiere dal Friûl.
__
Michele, cemût ise nassude la Friûlpoint?
La storie di Friûlpoint e nas di lontan, ancje prime dal 1999, dade di principi de ativitât, cu la creazion di cualchi maiute pe associazion FAF Fantats Furlans. Dopo, gno pari al à scomençât la ativitât de dite apont intal ‘99 in maniere pionieristiche. Ae fin di une lungje esperience li di une grande dite di vistiari, o ai cjapât in man jo la ativitât proponint la robe in mût simpri plui cualitatîf e professionâl. La idee che nus à sburtât e je stade chê di alçâ il nivel de percezion dal Friûl e dal furlan metint a disposizion ogjets di vistiari di alte cualitât e di mode, leâts in maniere direte ae lenghe furlane o a ideis che a riclamin il Friûl. O vin alçade la cualitât de propueste ancje dal pont di viste dai materiâi, creant un prodot unic: lis nestris maiutis a son une nestre produzion che o fasìn fâ di pueste, sedi tant che coton che tant che design.
__
Aromai o sês deventâts un simbul dal Friûl: in gracie di voaltris, la nestre Patrie e viaze ancje vie pal mont, no mo?
Sì, inte sostance si sintìn i “inventôrs” dai prodots furlans, che si limitavin al massim ae rapresentazion de acuile dal Friûl: nô o sin lâts plui inlà, in mût di furnî un prodot a pâr e in bande di chei des gruessis marchis che però a son globalizadis; invezit, cui che al à alc di nestri al dîs simpri alc di origjinâl. Il Friûl cun nô al viaze pal mont, e je vere: o vin tantis richiestis che o sin braurôs di sodisfâ, e se cualchidun al vûl deventâ buteghîr ancje in maniere direte tal forest o sin simpri pronts a lâ incuintri a cualsisedi esigjence.
__
E la rispueste dai furlans chi in regjon cemût ise?
Al è clâr che il nestri al è un marcjât di nicje, cjatâ spazi intes buteghis che a àn za dut e di dut nol è facil, ma al è biel cjatâ negoziants apassionâts e che a crodin in cheste idee. A son prodots particolârs, ma la rispueste dal public e je ecezionâl e nus stimole a fâ robis simpri plui bielis e a continuâ cun entusiasim.
__
I prodots che a van di plui cuâi sono?
O disarès ducj, dai nestris prodots di ponte sicu maiutis e felpis, ai ogjets tant che scudielis, magnets, russacuts… Cuant che o scomencìn un progjet o curìn tant la cualitât, sedi grafiche che intai materiâi, e duncje se o rivìn a proponisi o vin une biele rispueste.
__
O viôt che o vês la bandiere cu la acuile in tancj formâts…
Sì, o vin decidût di fâ une produzion cun tancj formâts e fatis cul simbul plui impuartant dal Friûl. Formâts che a van dal classic lizêr a chel piçul pes motos, o al nautic che al dure di plui di picjâ tes astis. Dut cun presits concorenziâi e materiâl simpri disponibil in graciis di une produzion in grande cuantitât simpri a disposizion par buteghis e privâts. Si pues dî che o volìn onorâ la bandiere produsintle cu la alte cualitât Friûlpoint.
__
Dulà vendêso i vuestris prodots?
O vendìn on line midiant dal sît, ancje in Italie e Europe, in maniere direte li de nestre sede a Lauçà e soredut, pe comoditât di ducj, inte nestre rêt storiche di buteghis di distributôrs che e je simpri in espansion. Ciertis buteghis cu lis t-shirt, ciertis cui gadgets e vie indevant: lait a viodi sul sît o domandait al negoziant dal vuestri paîs, e se nol à i nestris prodots disêtji di procurâ!
__
Par finî, lis novitâts di chest an cualis sono?
Lis presentarìn man a man sui social e o podês lâ a viodi sul sît ducj i gnûfs prodots: par esempli l’an passât o vin mandât fûr lis bandanis/scjaldecuel, che e àn vût tant sucès. Chês che a fasin plui curiositât, clâr, a son lis gnovis maiutis. In tancj a spietin seneôs lis novitâts dal an. E alore us doi cualchi anticipazion, cence spiâ masse: o vin alc di plui classic su la acuile furlane, ma intune forme gnove. O vin une robe une vore particolâr e “rock” che o soi curiôs di viodi ce acet che e varà, po dopo une maiute une vore simpatiche che e seguìs la nestre classiche linie ironiche. E ancje une suntune curiositât storiche che i furlans si son dismenteâts. E dopo tant altri, ma o speri di vêus za incuriosîts avonde cussì. ❚

………………………………………………………………………………………………………

FOCUS. Parcè che la maiute si clame “T-shirt”

Cemût mai par inglês la maiute si clamie “T-shirt”? La rispueste che e da il vocabolari Treccani e je avonde intuitive: vele, voltade par furlan.
◆ T-shirt ‹tìi šë’ët› locuz. ingl. (propr. «cjamese a T», parcè che la forme dal indument e somee une T maiuscule; pl. T-shirts ‹… šë’ëts›), doprade par tal. tant che s.f. – Maiute di coton, a maniis curtis, blancje in origjin e doprade tant che indument intim masculin, metude di resint ancje tant che toc di vistiari unisex, sedi blancje sedi colorade in maniere varie e decorade, dispès cun scritis o dissens.
◆ Altris ipotesis plui fantasiosis a fasin rimontâ la origjin dal tiermin ae T di training, parcè che la maiute e jere doprade par alenâsi, o a chê di teenager, par vie che le metevin soredut i plui zovins.
◆ Il prin a doprâ il tiermin t-shirt intal 1920 al è stât il scritôr Francis Scott Fitzgerald intal so romanç “The side of Paradise”.
◆ La storie di chest indument e rimonte di fat al principi dal secul passât, intal 1904, cuant che une aziende di vistiari specializade intal intim, la Cooper Underwear Company, e à inventade une «canotiere par no maridâts» elastiche e a cuel taront. E jere calcolade però tant che un indument intim, che al sarès stât scandalôs esibî in public.
◆ Intai agns Cuarante lis fuarcis armadis statunitensis le àn adotade pes monturis dai propris soldâts. Il so ûs si à difondût duncje a larc in Europe dilunc de seconde vuere mondiâl, intant che intai Stâts Unîts e dispopolave intai colleges.
◆ La rivoluzion de T-shirt e jere scomençade. ❚ (D.V.)

…………………………………………………………………………………………………………

LINK & LEAMS

Si pues lâ a viodi i prodots de Friûlpoint sul sît www.friulpoint.it, o sui social facebook.com/Friulpoint e instagram.com/friulpoint/. Par informazions si pues scrivi une mail a info@friulpoint.it o clamâ il numar 348 3191449 (ancje whatsapp) ❚

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +