Sfuei Mensîl Furlan Indipendent
Archivi de Patrie

UN BLANC E UN NERI. 4e pontade. Tirâ il lavôr

............

Cun gno pari no ai mai cjacarât tant, soredut di mulet. No che no lessin dacuardi, dome che la comunicazion verbâl no jere il nestri fuart. In compens, mi menave a cjace, a foncs e naturalmentri a vore. Simpri robis dulà che si cjacarave pôc o nuie, ma intant si faseve alc insiemi. A vore – sedi tai lavôrs di cjase e de braide, sedi in cantîr – i moments plui biei che jo o ricuardi a jerin cuant che no cjacaravin propit, parcè che la comunion tra nô doi e il lavôr e jere cussì perfete che jo, manoâl, o servivi il so lavôr prevignint lis sôs dibisugnis, come che si leiessin tal pinsîr. Al pues someâ strani, ma chel stâ insiemi trê o cuatri oris, lavorant a cidin, passantsi imprescj e scambiantsi in dut mieze cjaçade di peraulis, a son tra i moments plui intims che o ricuardi cun gno pari.

Mi è capitât di pensâ al lavôr cun gno pari, soredut chel di muredôr dilunc l’Istât, cuant che mi soi cjatât a fâ il tutor ai miei lavoradôrs volontaris. Chescj lavôrs a son un strument di integrazion, un servizi che al ven ufiert a chei che a àn domandât asîl e il gno rûl al è propit chel di doprâ il lavôr, che po al è lavôr manuâl, par creâ un leam. Un leam tra me e lôr, prime, ma soredut un leam tra lôr e il teritori, doprant no lis cjacaris ma une ativitât condividude. Imparâ e insegnâ fasint.

Lui al veve une piçule imprese edîl e ancje se al è in pension di agns mi capite ancjemò che cualchi so vecjo muredôr mi cjati te ostarie e mi pai di bevi, tacant la solfe che gno pari al è stât il miôr paron che al vedi mai vût. E in efiets, o crôt che in passe 30 agns di ativitât nol vedi mai licenziât nissun e no mi impensi nancje di vêlu viodût a vosâi a un dipendent. Insome, po stâi cualchi porcon ogni tant (ma o sin in Friûl) e di solit il destinatari o jeri jo, no i dipendents. E pûr, intant che tai agns 90 chês altris impresis, grandis e piçulis, a sieravis par vie che la ricostruzion e finive, la sô e à tignût bot e chest par un sempliç fat: lui al tirave il lavôr come ce. In cantîr al coreve, e chei altris a vevin di stâi daur. Nol domandave mai nuie ai dipendents che lui nol fasès miôr e plui di corse, e se al jere un lavôr pericolôs o rognôs, lu faseve lui. In pocjis peraulis: al dave l’esempli.

E in pocjis peraulis, fasint il tutor, o cîr soredut di dâ un esempli ai miei gnûfs borghesans. Se al è di passâ il seejerbe te plombe dal soreli, o voi jo. Se al è di tirâ vie il ricuart di cualchi cjochele incontinent intun parcament, lu fâs jo. Se mi disin che un lavôr al strache o no si rive a fâ, ur al fâs jo. Spes si ofindin, e al sucêt che mi disin “no, o fâs jo” e mi cjolin l’imprest di man. In sumis, o cîr di mostrâur cemût fâ, invezit di predicjâlu e vonde.

Ve mo. O pensi che i furlans cui forescj a vedin ducj di considerâ la impuartance di dâ il bon esempli. Invezit di cjacarâ di amôr pe patrie, fermâle di butâ il pachet di zigarets vueits par tiere. Invezit di pretindi rispiet pes tradizions, studiâle pardabon la storie (e no dome chê che e comude). Invezit di difindi lis nestris feminis dai forescj, tacâ a rispietâlis nô (e magari fermâle di clamâlis “nestris”). Invezit di violentâ la tiere cui confins, provâ a tratâle dute cun plui rispiet. Invezit di domandâ a lôr “parcè sêso scjampâts cence scombati” (la ultime monade di chei che a fasin la resistence cu la piel di chei altris), tacâ a fâ cori i talebans nostrans e a scombati noaltris di plui sul puest di lavôr, tai borcs e tas placis devant dai palaçs, invezit di lamentâsi sot de nape o, piês, su internet.

✒ Igor Londero

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +