Udin, une Provincie cuadrilengâl

Dongje de scrite par talian e furlan, su lis tabelis de jentrade de Provincie di Udin te sede centrâl e in chês periferichis, a cjataran puest ca di pôc ancje lis denominazions par sloven e todesc. Si è fat bon cussì l’ordin dal dì presentât dal conseîr Fabrizio Dorbolò (Sel) dilunc de ultime sentade dal Consei provinciâl dulà che al domandave la denominazion cuadrilengâl pal Ent e la estension de lenghe slovene e todescje tai ats uficiâi. Dorbolò al à fat riferiment ai contignûts des leçs 482/99 (tutele des minorancis linguistichis storichis), de 38/2001 (dulà che si ricognòs la minorance linguistiche slovene e e ven prudelade la lenghe fevelade de popolazion autoctone slovene storichementri insedade e residente tes provinciis di Triest, Gurize e Udin), plui la corelazion direte tra la specialitât dal F-VJ cu la presince des lenghis minoritariis. Daûr de richieste e de aplicazion de leç 26/2014 che e ridimensione lis Provinciis, il president de Provincie di Udin Pietro Fontanini al à proponût l’adeguament des intestazions dal Ent metudis devant des jentradis des variis sedis istituzionâls. Sul pont a son intervignûts ancje il conseîr Federico Simeoni (Front Furlan) e il cjâf grup Pd Salvatore Spitaleri. Chest inzornament al varà di cjapâ dentri, al domande inmò Dorbolò, ancje il portâl web e la cartelonistiche. Su chest il president Fontanini al à dit che il portâl istituzionâl al vignarà prest insiorât di gnûfs contignûts par sloven e todesc elaborâts dai sporteliscj che a son rivâts di pôc in Provincie. In merit ae cartelonistiche, Fontanini al à ricuardât che pes gnovis oparis l’Ent al previôt simpri une tabelonistiche plurilengâl.
Un discors in bande, l’adeguament de cartelonistiche turistiche: la Provincie, di fat, no podarà vê i fonts de 482/99 sul 2013 stant che la Regjon no à previodût di destinâ lis risorsis par chescj intervents. Il completament dal restaur che l’Ent al sta fasint di cetancj agns, al permetarès di lâ indevant cu la sistemazion dai panei che a son za metint une gnove pelicule cui tescj par talian, inglês e te lenghe minoritarie che e caraterize la aree dulà che a son metûts i cartelons. ❚
✒ Redazion