IL GRANT LUNARI DAL FRIÛL. Fevrâr

Il soreli, la atmosfere, la nature
Tai prins dîs dal mês di Fevrâr il soreli si cjate a mieze strade jenfri il solstizi di Unvier e l’ecuinozi de Vierte e al va indevant te sô corse viers il nord slungjant di un grum la durade dal dì.
Di un pont di viste atmosferic, Fevrâr al è il mês plui variabil di ducj, par vie che al pues puartâ ancjemò il grant frêt cun glace e nêf (Fevrâr piês di dut), o ben pandi zornadis clipis e plasevulis (a S. Valentin al cjante l’odulin) e il disglaçament di riu e torents. Dentri de tiere al tache a movisi il fûc de vite gnove e la nature e pant i segnâi dal disveâsi cul saltâ fûr de jerbe (Fevrarut, ogni jerbe il so cjavut), cu lis primis rosis (primulis e violis) tai ripârs soreglâts e cui svoi dai uciei za in amôr tai cîi limpits.
Voris dal cicli agrari
E va indevant la polse des voris agrariis, ma il contadin al tache a verificâ tal batût il stât dai imprescj e a viodi di ogni pussibile necessitât (massime a sistemâ e a justâ la cjase e la stale in spiete di tacâ di gnûf lis voris in campagne). In ocasion de Madone Cereole, o ben dal divisori dal Unvier, al va indevant cuntun control de situazion des scortis, sigurant che a sedin consumadis dome de metât, par podê rivâ cun chei altris prodots ingrumâts (prodots de tiere, mangjantive conservade fin ae fin dal Unvier, vin pai oms, blave e cereâi pai animâi de stale e dal curtîl, legnam, torbe e cjarbon pal riscjaldament). Chei che no lu àn za fat in Otubar e Novembar, cumò a fasin la cuinçadure des vîts, fasint però atenzion aes zulugnis noturnis e aes ultimis glaçadis. Tai cjamps, tai podês e tai orts, dopo une biele netade dai fonts di plante fûr gjavant barascjam e sterps, si fâs la svangjadure, par sigurâ lûs e aiar ae tiere, e la coltade dai terens cun ledan. Tai orts parâts lis feminis a semenin selinos, cevolis, ravanei, pomodoros, bledis, carotis, cesarons, savôrs, basili, pevarons, melanzanis e si plantin rosmarin, salvie, tim e mazorane. Tai zardins a vegnin fatis lis cuinçaduris des plantis e il tai des menadis, a vegnin regolâts e solçâts cisis, arbuscj e simpriverts. Te cjanive il contadin al ten simpri di voli la maturazion dai vins e il lôr travâs tes zornadis limpidis e frescjis, al da aiar ai locâi li che si tegnin i vins, la cjar purcine insacade, i formadis e i altris prodots conservâts pal lunc Unvier. E va indevant la cuinçadure des vîts tes zornadis plui favorevulis, cu la colte e la risistemazion dai pâi di sostegn. ❚