Udin: premiâts de Aclif i progjets pe promozion de lenghe furlane inte zornade dai Conseis Comunâi dai fruts dal Friûl

A son stâts passe 200 – tra zovins students, insegnants e acompagnadôrs, cualchidun rivât fin di Paulâr, intal cûr de Cjargne, pûr di no pierdi chest moment tant impuartant – i protagoniscj de seconde edizion de “Zornade dai Conseis Comunâi dai Fruts dal Friûl”, organizade de Assemblee di Comunitât Linguistiche Furlane (ACLiF, che e à 141 Comuns aderents) a Udin intal auditorium Comelli, te sede de Regjon Autonome Friûl-Vignesie Julie.
◆ Pe ocasion a son stadis fatis ancje lis premiazions dal concors par progjets di promozion de identitât furlane: a vinci il premi – un contribût economic par realizâ il progjet – i Conseis Comunâi dai Fruts di Glemone, Merêt di Tombe, San Denêl, Dartigne, Muçane, San Vît di Feagne e Voleson Darzin cun San Martin dal Tiliment (Consei comunâl dai Fruts ugnul par chei doi Comuns). Intervents dal president de Assemblee Daniele Sergon, sindic di Caprive, di Mauro Bordin president dal Consei regjonâl dal Friûl-Vignesie Julie e de assessore regjonâl aes financis Barbara Zilli. L’event al è stât condusût dal atôr Claudio Moretti.
◆ La jurie formade de ACLiF, cun ancje i siei vecjos presidents e adun cun ARLeF e Societât Filologjiche Furlane, e à lavorât fis par valutâ i progjets. In dut a àn partecipât al concors 14 Conseis Comunâi dai Fruts. Di là dai 7 nomenâts che a àn vût il contribût, segnalazions ancje par Cjarlins, Paulâr, Porpêt, Rude, Talmassons, Tavagnà e Tresesin.
◆”I conseîrs dai Conseis Comunâi dai Fruts – al à marcât Sergon – a àn une incarghe di interès public, paragonabil a chel dai coleghis adults che a son sentâts intai Conseis Comunâi: ancje la lôr vôs e va scoltade insiemi a chês altris dal teritori furlan. O vin decidût di fâlu in maniere concrete organizant la Zornade e il concors, che a Udin nus à permetût di ringraciâju pal lôr impegn e di compagnâju viers l’avignî. O vin sielt 7 dai progjets che a àn mandât pal concors, ma al è di dî che ducj chei che a àn partecipât a vevin une carateristiche in comun: l’amôr e la passion pe culture e pe lenghe furlane e l’impegn par puartâle indenant. Ai zovins conseîrs ur dîs di sintîsi furlans braurôs simpri, simpri furlans”.
◆ “Viodi ducj chei fruts entusiascj e plens di voie di fâ par judâ lis lôr scuelis e comunitâts cuntune disposizion propositive e partecipative rispiet a chel che al sucêt sul lôr teritori – al à zontât Bordin – e je une iniezion di energjie fantastiche par cui che, come me, al à une incarghe politiche e si impegne ogni dì pal ben dal Friûl-Vignesie Julie”.
◆ “L’avignî de politiche de nestre regjon al fâs ben sperâ. A testemoneâlu a son i fruts presints vuê al event organizât de Assemblee – e à dit Zilli – che si viôt che a son emozionâts. Cheste partecipazion largje e sintude nus da ancjemò plui responsabilitât par lavorâ inte maniere miôr pal ben dal nestri Friûl-Vignesie Julie e, in chest câs, ancjemò di plui pal Friûl, considerât che la iniziative e je dedicade ae comunitât furlane, ae sô lenghe e ae sô identitât. Elements che o vin di jessi simpri braurôs”.
◆ Presints ancje i rapresentants dai Conseis Comunâi dai Fruts di Codroip e Ruvigne. Salûts istituzionâi di bande dal president de Societât Filologjiche Furlane Federico Vicario, di Stefania Garlatti Costa conseire delegade al furlan e multilinguisim dal Comun di Udin. Invezit, a rapresentâ la ARLeF e il so president Eros Cisilino e je stade la delegade Vania Petoello, che e à fat ancje part de jurie dal concors adun cul president Sergon e i siei doi predecessôrs Diego Navarria e il conseîr regjonâl Markus Maurmair, che a jerin presints ancje lôr. In rapresentance dal Consei de ACLiF a àn fevelât Ornella Comuzzo (Comun di Tavagnà), Alessandra Vanone (Tresesin) e Ester Filippuzzi (Spilimberc). Presints ancje tancj altris sindics e aministradôrs a compagnâ i lôr Conseis Comunâi dai Fruts. Coordenament de Zornade dal segretari ACLiF Claudio Romanzin. ❚