✽✽ Mês suturni, chel di Novembar: a tornin iniment i ricuarts di cui che nol è plui, dispès cul interogatîf di no vê vût il timp par cognossiju dafonts o di no jessi stâts bogns di vê un rapuart plui intens. Ve, o podaressin clamâ Novembar il timp dai rimuars.
E la nestre storie, chê dal Friûl, e cor il pericul di cjapâ sù dutis chestis carateristichis. O sin propit brâfs a recriminâ su lis robis, ma simpri dopo che a son sucedudis, maledint il moment des sieltis fatis e suspirant su chel “ Se o vessin savût, se o vessin fat intun altri mût…”
✽✽ Un sisteme di autoassoluzion che, al limit, al covente par justificâ il compuartament che si à devant dai problemis. Conclusion: ae fin e je simpri colpe di cui che nus à ingjanât, di cui che si è mot in maniere cuvierte cuintri di nô.
✽✽ Cjapìn il câs de contraposizion classiche tra Triest e il Friûl. Gjavìn dutis lis componentis folcloristichis di tifôs di curvis contraris, di barzaletis picantis, ancje se dutis dôs a son pûr simpri espressions di un sintiment slargjât, e restìn invezit sui fats reâi.
✽✽ La capitâl regjonâl cu la prossime riedizion des provinciis si cjate intune posizion favoride, di osservadore autentiche, nancje curiose: pe citât nol cambiarà nuie, anzit, e à di front ancje la opzion “metropolitane”. In chest contest favorît e je daûr a centralizâ servizis e competencis, e invistìs riui di bêçs publics in oparis inutilis e faraonichis tant che il puartâ i uficis regjonâi in Porto Vecchio o la ridicule “Ovovie”.
✽✽ Pal Friûl al è dut un altri discors: la agregazion istituzionâl tra lis trê provinciis furlanis e je un percors che za in passât nol à cjatât spuinde – e nancje no le cjatarà – inte politiche, che anzit e tint a gnovis divisions cun aleancis trasversâls che a smirin dutis a minâ il stes concet di unitât identitarie, linguistiche, storiche in non di un regjonalisim F-VJ proietât al talianon “Tre Venezie”.
✽✽ Chescj no son plui segnâi, a son realtâts che la societât furlane e assist cence dî nuie, preparantsi al prossim “Ma jo no lu savevi”. ❚
