Tui e Tuie a insegnin ai fruts lis buinis regulis dal vivi in comunitât

Di produzion russe, a son stâts za trasmetûts cun sucès di Disney Channel
in Australie e in Gnove Zelande.
E cumò su Telefriuli
Al è stât il Museu di Cjase Cocel di Feagne, ai 18 di Fevrâr, il prin palc pe presentazion publiche de gnove serie di cartons animâts Tui e Tuie, “firmâts” ARLeF, la Agjenzie Regjonâl pe Lenghe Furlane.
Dopo dai esperiments di alt gradiment de Pimpa e di Omenuts, seriis di cartons animâts di cualitât che a fevelavin par furlan e che a jerin dedicâts aes scuelis de infanzie, cumò al è il moment di cheste gnove serie che e ven de Russie, e che e je za stade trasmetude cun sucès di Disney Channel in Australie, in Gnove Zelande e in altris Paîs. Cumò e va in onde su Telefriuli, dentri de trasmission “Maman!” e tal spazi “Telefruts”.
La ARLeF e à fat la version in lenghe furlane dal carton animât (in colaborazion cun Belka Media – Raja Films), cumò disponibile ancje intune biele racuelte dvd cun dentri 34 episodis. Protagoniscj de animazion a son doi gjatuts blu une vore tenars, ma un pôc pastrocjons. Tui e Tuie a son fradi e sûr. Midiant di une scjate magjiche e di une imagjinazion ferbinte a vegnin traspuartâts lontan di cjase e a vivin aventuris plenis di sorpresis e di scuviertis, imparant dai compagns di viaç cualchi buine norme di vite sociâl. Il dvd cu lis aventuris di Tui e Tuie al podarà jessi ritirât li de ARLeF, a gratis, dai insegnants e di ducj chei che a vuelin doprâlu par finalitâts ludichis e didatichis.
«La Regjon e ten une vore ae sô specialitât leade aes diversitâts linguistichis dal teritori – e à dit Alessia Rosolen, assessore regjonâl ae Istruzion, che e à partecipât ae presentazion -. Su chest, tantis robis a son stadis fatis e altris a son in cantîr par valorizâ il plurilinguisim, tacant des scuelis de infanzie».
«La ARLeF e je daûr a lavorâ cetant par furnî ai fruts prodots di cualitât par imparâ il furlan – al à marcât il president, Eros Cisilino -. Chest carton animât, cun di plui, al puarte cun se un messaç sociâl fuart, stant che al insegne ai fruts, in maniere simpatiche e lizere, piçulis regulis dal vivi civîl che lis fameis a savaran dal sigûr preseâ».
In plui de presentazion, si è tignût li de ARLeF un incuintri fra il president Cisilino, la assessore regjonâl Rosolen e la diretore gjenerâl dal Ufici scolastic regjonâl, Patrizia Pavatti. De riunion e je vignude fûr la volontât comune di lavorâ insiemi par miorâ ancjemò di plui lis ativitâts di insegnament de lenghe furlane, in particolâr sveltint lis proceduris pal finanziament des scuelis. De bande sô, la ARLeF si è impegnade intune azion fuarte par inviâ la certificazion linguistiche, pe realizazion di materiâi didatics (in cjarte e eletronics) e par meti in pîts un gnûf sisteme pe formazion in servizi dai insegnants di furlan. ❚
par cure de redazion