Capî la Europe, riflessions su Onde Furlane e ae Universitât di Udin

Ai 26 di Mai si torne a votâ pal Parlament european. A son passâts cuarante agns des primis, storichis elezions europeanis, ma ancje in cheste ocasion, salacor ancjemò di plui di in chê volte, il vôt al varà une impuartance politiche specifiche a nivel continentâl. Cun di plui, al è daûr a cressi intune part de societât un ategjament negatîf viers de integrazion europeane e des istituzions. Par chel, vie pe seconde metât dal mês di Març si davuelzaran, in particolâr ator pal Stât talian, une schirie di iniziativis che a àn chê di promovi cognossince e duncje cussience in cont de Union europeane, dai siei orghins, de sô ativitât e des elezions, inte suaze dal program “Verso il 26 maggio: l’Europa a portata di mano”.
A saran cuatri apontaments ancje in Friûl, metûts adun par iniziative dal Centri di documentazion europeane dal Ateneu furlan “G. Comessatti”, de Aree Bibliotechis de stesse Universitât e de Cooperative di Informazion Furlane: trê pontadis de trasmission “Vierte Europe”, produsudis e difondudis di Radio Onde Furlane ai 19, ai 23 e ai 27 di Març, e un incuintri public, li de sale Gusmani de Universitât dal Friûl (a Udin, Palaç Antonini, in vie Pressacco 8), tal dopomisdì dai 21 di Març.
A son cuatri ocasions par cognossi e par capî, che a vegnin inmaneadis cul jutori de Rapresentance tal Stât talian de Comission europeane, e cu la colaborazion di une schirie di sogjets tant che l’Informagiovani dal Comun di Udin, la Casa per l’Europa di Glemone, l’EURES regjonâl, Il Centri Europe Direct di Pordenon, la Accademia Europeista del Friuli-Venezia Giulia di Gurize, la AUSE – Associazione Universitaria di Studi Europei, il Consiglio italiano del Movimento Europeo e la associazion di promozion sociâl e culturâl KLARIS.
Altris informazions si cjatin in rêt ae direzion https://www.uniud.it/it/servizi/servizi-studiare/biblioteche/sedi/biblioteca-del-centro-di-documentazione-europea-cde ❚
Marco Stolfo