FONDAZIONE FRIULI. 600 mil euros par vecjos e disabii

La Fondazione Friuli e à inviât il secont bant “Welfare di comunitât”, che al nas de sinergjie cu lis istituzions e cul contribût di Intesa Sanpaolo. La iniziative e je stade presentade inte sale cunvignis de Fondazion in vie Manin a Udin ai 17 di Zenâr, ae presince dal president Giuseppe Morandini, dal diretôr dal servizi integrazion sociosanitarie de Regjon Ranieri Zuttion, dal diretôr regionâl di Intesa Sanpaolo pal Venit, Friûl-Vignesie Julie e Trentin-Sudtirôl Renzo Simonato, e dal vicepresident de Region Riccardo Riccardi.
Si trate de seconde edizion dal bant che al à une dotazion di 600 mil euros e al è indreçât a sostignî i progjets che a interessin lis personis anzianis no autosuficientis, i minôrs in cundizion di disasi e lis personis cun disabilitât psicofisiche, cun chê di incentivâ il disvilup di gnovis progjetualitâts e la pussibilitât di dâ continuitât aes iniziativis premiadis cul prin bant. Chest an al è stât inserît un focus particolâr sui intervents inovatîfs e ancje sperimentâi par sostignî la domiciliaritât midiant di sistemis di telemonitorament e di teleasistence, un cjamp dulà che la tecnologjie e pues dâ un grues contribût par miorâ la cualitât de vite pes personis plui anzianis.
In graciis dal contribût di Intesa Sanpaolo, si podarà tirâ dongje altris risorsis dal teritori creant un volan che tal 2018 al à permetût di disvilupâ progjets cuntun cost previodût che al vâl cuatri voltis l’impuart des risorsis dadis fûr inte suaze dal bant. Ancje cheste volte e torne a jessi impuartante la colaborazion jenfri istituzions che, adun cul privât, a son un supuart fondamentâl pe creazion di un gnûf welfare comunitari, in stât di meti dongje realtâts diviersis par sburtâ sul disvilup di formis di intervent inovativis, peculiârs inte assistence sanitarie e sociâl.
Il bant al previôt tant che cundizion un partenariât fra sogjets publics e ents dal tierç setôr: cheste modalitât e à permetût di esprimi capacitâts progjetuâls che si poin sul intervent public e suntune straordenarie rêt di associazions, volontaris, personis di buine volontât. Il tiermin par presentâ lis domandis al scjât ai 28 di Fevrâr. Il test integrâl dal bant e la modulistiche si cjatin sul sît www.fondazionefriuli.it
Par vê informazions si pues clamâ il numar 0432/415811. ❚
Piero Cargnelutti