Tu dîs di sì

E a un ciert pont de tô vite tu âs tacât a fâ cariere, tu ti sês rindût cont che ti àn notât pe tô maniere di jessi, ti àn sielt pal to snait; e par te al è stât facil, parcè che tu tu sês une persone di valôr. A ti ti è bastât dome dî di sì; e tu sês rivât a lâ simpri plui adalt. Parcè che a un che al è babio i baste pôc e al capìs a colp!
◆ In dì di vuê i vûl jessi svelts! Veloçs di cjâf! E stâ simpri un pas indaûr rispiet a chel che tu tu âs di dîi di sì. Il truc al è dut alì, li al è cuiet, li si sta ben!
◆ Ma cumò tu sês deventât grant!! Tu sês un dirigjent! Une colone de tô realtât! Tu âs fate la storie! Il to parê al è impuartant! Fondamentâl! A vegnin a cirîti!
◆ E par selezionâ i zovins?
Tu ti sês acuart che al è facil, une monade! Baste tirâsi simpri plui dongje chei che a valin! Cemût si fasial a capî cuâi che a son chei che a valin?! Un che al vâl al è svelt, veloç e intun moment al capìs e ti dîs di sì! ❚