La Beibarhaus di Sauris, tiessidure che e met dongje tradizion e inovazion

Tal borc di Sauris Disot si cjate la Beibarhaus (“Beibar” in sauran al vûl dî tiessidôr e “Haus” cjase): un laboratori artesanâl di tiessidure.
◆ “Jo o soi di chei de famee che e fâs persuts, duncje o ai lavorât inte aziende di famee par 21 agns: mi ocupavi di personâl, cualitât, sigurece… – al conte Cristian Petris – robis che no jerin intes mês cuardis, no si adatavin al gno caratar. A un ciert pont, o ai decidût di cambiâ. Cuant che tu âs une aziende di famee no tu ti fasis tantis domandis su ce che tu volaressis fâ di grant; i gjenitôrs si spietin che tu ledis indevant cul lavôr di famee. Cussì o ai decidût di lassâ chest lavôr, ma cul pont fer di restâ a Sauris, par vie che m sint inlidrisât te mê tiere e o soi simpri atîf inte vite sociâl dal gno paîs (tal côr, inte Pro Loco e v.i.). Mi soi cjapât un an di timp e o soi lât a Trent e in Sudtirôl fasint cors di cusidure e filadure come “plan B” e ancje un cors di manutentôr dal vert come “plan C” se al fos coventât”.
◆ I incuintris te vite a judin a cjatâ gnovis stradis: “Intant, par câs, parcè che – al confesse Cristian – no varès mai pensât di finî a fâ il tiessidôr, o ai savût di dôs sioris che a Sauris a stevin puartant indevant cheste ativitât: une e jere lade in pension e chê altre e varès finît pôc dopo”.
◆ E cussì “tal Jugn dal 2019 il proprietari dal laboratori mi à visât che al varès sierade la ativitât. Alore o ai scugnût acelerâ i timps e imparâ di corse, provant e falint une vore”. Ma nissun al fale dibant, se i erôrs ju dopre par imparâ. “L’obietîf primari al jere otignî un puest di lavôr intal gno paîs e fâ une robe plui creative, plui dongje ai miei guscj, fûr de burocrazie. O ai rilevât la ativitât tal Zenâr dal 2020, ma nancje a fâ a pueste al è daurman rivât il Covid. No mi sarès mai improvisât cussì cence une sigurece e cence l’aiût di une mê colaboradore che e je tant esperte soredut sui tapêts”.
◆ Imparâ al è il prin pas par scomençâ a inventâ: “In laboratori o cirìn di fâ inovazion ancje se il timp al è pôc, par vie che o vin ancje la buteghe. O fasìn tapêts, centri taule e siarpis. O doprìn lis tramis de “tiessidure di necessitât” di une volte — chê “puare” — cul romp o la liscje di pes. I filâts a son lin, lane e cjanaipe. Ogni an o semeni un pôc di lin par fâlu viodi ai fruts e ai grancj cuant che o fâs i cors e mostrâ dute la filiere, de plante al telâr”.
◆ Intune ete dulà che lis cuistions di gjenar a son impuartantis, chest lavôr al somearès, cjalantlu cul voli dal prejudizi, “lavôr di feminis”. Par nuie. “Une volte – al conte Cristian – a Sauris i tiessidôrs a jerin oms. Lis feminis a filavin e i oms a lavoravin sul telâr, soredut di Invier cuant che no si podeve lavorâ fûr. Al jere une vore pesant”. Vuê i timps a son cambiâts. “Un artesan spagnûl timp indaûr mi à dit: «A fâ chest lavôr no si vuadagne tancj bêçs, ma si divertissisi un grum». Jo o pues dî che in chest mistîr e covente tante passion. O doprìn telârs manuâi, ancje se si podarès doprâ argagns tecnologjics par jessi plui flessibii, ma si riscje di pierdi la manualitât. I nestris lavôrs a son preseâts di tante int.
◆ Il vantaç di jessi a Sauris al è chel di jessi intun puest turistic frecuentât di un grum di int che e ven di fûr e che ven achì e nus sosten inte nestre ativitât. Tes stagjons plui calmis o fâs i ordins par comission. I miei a son ducj tocs unics. No ai timp par ocupâmi des venditis on line. Ancje parcè che al è just che la int e vegni a Sauris a tocjâ cun man la cualitât e a respirâ l’aiar dal puest”.
Par savê di plui si pues curiosâ tal sît www.tessiturasauris.com ❚