Termis di Darte: gnove gjestion par un gnûf rilanç

Daspò la decision de Cjase di Cure Citât di Udin di recedi dal contrat di afit pe gjestion des Termis di Darte, a partî de metât di Zenâr e je la PromoTurismo FVG che e à cjapât in comodât il stabiliment termâl de Cjargne. Cussì al à volût il Comun di Darte, paron de struture, cu la volontât di mantignî in ativitât il lûc di cure e di benstâ, in mût di garantî che e resti vivarose la ufierte turistiche cjargnele inte stagjon invernâl.
la gnove gjestion e durarà fin ai 31 di Març e il supuart operatîf  al è stât afidât al Consorzi Carnia Welcome, che il so president Massimo Peresson al è fradi dal sindic di Darte, Marlino. Intant, la aministrazion comunâl e je daûr a inmaneâ il bant di gare pal afidament de struture a un gnûf gjestôr.
Come che al veve evidenziât l’assessôr al turisim e aes ativitâts produtivis Sergio Bolzonello, in ocasion di un incuintri ae fin di Dicembar cul sindic di Darte, il diretôr gjenerâl di PromoTurismo FVG Marco Tullio Petrangelo e cul ufici di gabinet de Regjon: «la fuarte volontât di garantî la continuitât dai servizis, e à l’obietîf di valorizâ invistiments impuartants di potenziament dal implant, realizâts fin cumò de bande de aministrazion regjonâl e comunâl.»
une atenzion speciâl e je stade dedicade ancje ae tematiche dal sparagn energjetic, parcè che lis Termis di Darte a àn coscj di spese pardabon alts e duncje l’acuardi fat cu la Secab (Societât Eletriche Cooperative de Alte Bût), par doprâ il calôr prodot de vicine centraline a biomasse, al podarès risultâ une rispueste significative aes grandis spesis di mantigniment.
In chest Invier, fin cumò ben pôc sblancjât di nêf, lis Termis di Darte a restaran duncje viertis, cun oraris che a van: dal lunis al vinars des 14.00 aes 20.00, sabide e domenie des 10.00 aes 20.00. A son garantîts i servizis: zone pissinis, estetiche e benstâ. Cussì almancul fin ai 31 di Març. (Par informazions: www.termearta.org; e-mail: info@termearta.org, tel: 0433.929320). ❚
✒ Alessio Screm