Pieri Fontanini di ultin dai Mohicans a prin citadin. Cuntun atac a Rome

Se pe Presidente de Regjon Serracchiani e il so fedêl assessôr aes “Autonomiis locâls” Panontin (cjalant ce che a fasin, cheste definizion e somee cuasi un ossimor…) il destin des provinciis al è segnât, pal on. Fontanini, president de Provincie di Udin, la bataie no je dal dut sierade. E i cole juste la definizion “ultin dai Mohicans” che al scombat fin insom prime di molâ lis armis: a Zenâr al à partecipât ae audizion in Comission Afârs Costituzionâi de Cjamare dai Deputâts par esprimi la sô contrarietât ae riforme Panontin che e previôt la scancelazion des 4 provinciis regjonâls par fâ nassi lis 19 Unions teritoriâls intercomunâls (UTI), in realtât “miniprovinciis”, ma che a àn, tra i tancj difiets (no saran nancje eletivis…), ancje chel di no jessi ents di “aree largje” e duncje cun funzions e prospetivis limitadis rispiet a ce che al è stât fat fin cumò de bande des provinciis “veris”.
cun di plui, daûr dal resonament di fontanini, la eliminazion des provinciis e sarès un at anticostituzionâl stant che la riforme dal Statût regjonâl e larès in contrast cu la Costituzion, ma ancje cu la leç taliane “Delrio”, che a previodin inmò la esistence dal ent provinciâl.
e in dut chest, une scjassade al dibatiment politic l’on. Fontanini le à ancje dade su la citât di Udin, dulà che il Centridrete di timp al cîr di cjapâ la maiorance: difat, il Pieri di Basandiele al à dade la disponibilitât par cori tant che prin citadin. Cheste declarazion, un tic anomale par cemût che e je vignude fûr, e à mot coments sedi a pro sedi cuintri. Cualchidun al à fat presint il curriculum politic dal ex sindic di Cjampfuarmit, ex Deputât, ex Senatôr, ex President dal Consei Regjonâl, ex President de Regjon, ma al è ancje di ameti par onôr de veretât che l’atuâl President de Provincie di Udin Fontanini si è simpri vuadagnât la “cjadree” cu lis elezions, cence pôre di confrontâsi cui eletôrs, che in efiets lu àn premiât votantlu. ❚
✒ Redazion