TERITORIS – OMS DI LIBERTÂT. Lluís Companys, une vite al servizi de idee republicane (Catalogne)

Catalanisim, republicanisim e justizie sociâl. A son chescj i ideâi che a àn segnât la vite di Lluís Companys i Jover (1882 – 1940), prin president dal Parlament de Catalogne (1932 – 1933) e president dal Guvier catalan (Generalitat de Catalunya) dal 1934 al 1940.
Ativist republican bielzà di student, une volte deventât avocat al lavore cul sindacât in difese dai lavoradôrs. Cheste sô ativitât, intune cul impegn politic intal front republican e catalanist, lu puarte a jessi impresonât plui voltis. Intal 1931 al cjape part ae fondazion de Esquerra Republicana de Catalunya e pôc dopo, in rapresentance di chest partît, al rive ae vuide dal Comun di Barcelone. Al è un dai oms che, ta chel stes periodi, a son daûr de proclamazion de Republiche catalane: une indipendence formâl che e dure a pene 72 oris, ma che e vierç la strade pal Statût di autonomie catalan.
Il colp di stât militâr lu cjate ae vuide dal Guvier de Catalogne, une des areis che a resistin plui a dilunc al assalt des fuarcis fassistis spagnolis (e dai lôr aleâts todescs e talians). Cuant che aromai ancje la Catalogne e je pierdude, tal Zenâr dal ‘39, al passe in France là che al manten la vuide dal Guvier catalan in esili. Un an e mieç plui tart al è arestât dai naziscj in Bretagne e consegnât al regjim di Franco. Ai 15 di Otubar dal 1940 al ven fusilât alì dal cjistiel di Montjuïc. Fedêl fint insom ai siei ideâi, lis sôs ultimis peraulis a son “Per Catalunya!”.
CARLI PUP