TERITORIS – INTERNAZIONÂL. L’aiar de indipendence al sofle fuart sul Paîs Basc

E pensâ che fin a cualchi ore prime des scjadince utile par presentâ lis candidaturis nol veve nancje di cori. Invezit, no cate i tancj tentatîfs des autoritâts politichis centralistis e de magjistrature spagnule di blocâ la liste, la coalizion de çampe indipendentiste Bildu e je la vere vincidore des elezions aministrativis tal Paîs Basc. Di fat, se in Spagne il risultât plui eclatant e je stade la sconfite dal partît socialist di Zapatero che al vuide il guvier di Madrid, tes provinciis baschis il miôr risultât lu cjape cheste gnove coalizion che e met adun rapresentants de çampe indipendentiste, Eusko Alkaltasuna (nazionaliscj di çampe) e Alternatiba (jessûts de sezion basche di Izquierda Unida).
La partecipazion ae competizion eletorâl e je stade pussibile in gracie dal pronunciament de Cort Costituzionâl di Spagne che e à ametût in extremis une part (al moviment Sortu, di fat, i è stât impedît di cori pes elezions) di chê aree politiche tignude fûr de azion di criminalizazion metude in at par agns de politiche e de magjistrature spagnole. Za de campagne eletorâl e dai events che a àn compagnât lis zornadis prime des elezions si nasave alc: grande partecipazion e sucès pes iniziativis di Bildu a Bilbao, ma ancje a Donostia e ta chês altris zonis clamadis al vôt.
I risultâts finâi a àn dât a Bildu 313 mil vôts (22% dal totâl) e il numar di elets plui alt intal Paîs Basc (Navare comprindude). Il moviment de çampe indipendentiste basche al devente cussì decisîf in tantis aministrazions locâls, in plui di concuistâ un biel numar di sindics.
Christian Romanini