TERITORIS – INTERNAZIONÂL. Il Tratât di Lisbone par furlan

“Pier Paolo Pasolini al scriveve Fevelà Furlan a voul disi fevelà Latin” cun chê di marcâ il valôr de lenghe furlane e la impuartance di doprâle in libertât. In dì di vuê si podarès dî Fevelâ Furlan al vûl dî fevelâ European” par contindi che il furlan al è une risorse pe contemporaneitât e pal futûr, in particolâr cuntune vocazion e intune dimension che a son europeanis”. Marco Stolfo al presente cun chestis peraulis la idee che e sta daûr di Il Tratât di Lisbone, libri e cd-rom publicâts de Cjase pe Europe di Glemone.
Cheste iniziative editoriâl, progjetade e coordinade di Stolfo, e met dongje une schirie di saçs, cuntun tai divulgatîf, dedicâts a un trop di argoments che a tocjin la integrazion europeane, la realtât  de regjon Friûl-VJ e il rapuart jenfri Friûl e Union Europeane (UE). Trê a son itindiments: promovi la cognossince de UE, la costruzion de unitât politiche de Europe, il rapuart tra Friûl e UE; valorizâ lis lenghis des minorancis, doprantlis par fevelâ di Europe”; marcâ la europeicitât” di chestis lenghis (massime di chê furlane, che e je la uniche a jessi simpri in condizions minorizadis) e dai dirits linguistics.
IL TELÂR_ Il libri al à cuatri sezions tematichis e une cuinte su la Europe che si cjate” in regjon.  Te prime part o vin Claudio Cressati de Universitât dal Friûl e il Vicepresident de Cjase pe Europe, Renato Damiani, che a frontin i contignûts dal Tratât di Lisbone. La seconde sezion e tocje tutele des minorancis e cooperazion teritoriâl: Stolfo al presente la suaze gjenerâl dai doi argoment, intant che Leopoldo Coen de Universitât dal Friûl al sclarìs ce che al è un GECT (Grup european di cooperazion teritoriâl). La tierce part e viôt Giorgio Grimaldi de Universitât de Val di Aoste, che al analize la dibisugne di une UE plui politiche e mancul burocratiche tai setôrs dal ambient e de energjie e Elena Anziutti de Cjase pe Europe, che e presente lis politichis europeanis pai zovins. La sezion storiche e ten dentri i saçs di Paolo Caraffini (Universitât di Turin) sui moviments federaliscj e europeiscj in Italie, di Marco Stolfo su grups nazionalitaris e Europe e di Lara Piccardo (Universitât di Gjenue), che e scrîf sul ultin slargjament de UE. La ultime part e da lis coordinadis par podê cjatâ associazions e istituzions impegnadis te promozion de cognossince de Europe e de cussience europeiste. Il cd multilengâl (lis lenghis de nestre tiere), cun bibliografiis e sîts internet sul argoment, dut dividût par areis tematichis, al complete la opare.
Info: www.casaxeuropa.org
Mauro Della Schiava