Sfuei Mensîl Furlan Indipendent
Archivi de Patrie

TERITORI – SLOVENIE. Il teatri dai pipinots… par sloven

............

LUTKE!_ Si clame Lutke, ven a stâi «pipinots»: al è un festival internazionâl di spetacui pal teatri li che i protagoniscj a son rês e fadis, manigolts e poliziots, princips e cercandui che a cjapin vite midiant lis mans e lis vôs dai atôrs in cjar e vues. Cheste rassegne sui generis si ten a Lubiane ogni doi agns, inmaneade – juste apont! – dal Lutkovno Gledališče Ljubljana (www.lgl.si), vâl a dî il Teatri dai pipinots di Lubiane, che al à à sede propi tal cûr de capitâl slovene, da pît dal cjistiel. Nassût tal 1948 tant che teatri citadin, in pôc plui di sessante agns a son stadis proponudis in sene passe 23 mil rapresentazions, clamant dongje trê milions 200 mil spetatôrs; vie pai agns, i atôrs de compagnie si son fats valê cu lis lôr oparis in centenârs di citâts vie pal mont.
La ultime edizion di Lutke si è tignude tal Setembar dal an passât: il prin premi al è lât a un spetacul inmaneât dal Teatri sloven dai zovins adun cu la associazion artistiche Konj (Cjaval), che a àn vinçût ancje par vie de creazion di pipinots pardabon origjinâi. Tal 2008 a àn cjapât part ae manifestazion compagniis di mieze Europe, pandint cemût che il teatri cu lis lutke al sei preseât vie pal forest: de Spagne ae Bielorussie, de Norvegje a Cipri passant traviers Gjermanie, Italie, Bulgarie… Insumis, uns cuarante compagniis si son cjatadis adun par fâ contents i piçui (ma ancje i grancj), contant storiis di fantasie o reâls, peadis ae vite di ogni dì. E chest ognidun doprant la sô marilenghe, puartant cussì a Lubiane buine part des fevelis dal Continent Vieri.
CENT AGNS DI PIPINOTS_ La art di creâ pipinots e nas in Slovenie juste un secul indaûr: il pari di cheste forme di teatri al è Milan Klemenčič, pitôr, nassût a Salcan (duncje su la rive dal Lusinç) tal 1875. Tai agns de sô zoventût al à vût studiât prime a Gurize po tal gjinasi a Triest; viers la fin dal Votcent al à frecuentât sei la Academie di art di Vignesie sei la Brera di Milan par po spostâsi in Gjermanie a Munic. Cjatât un lavôr fis a Aidussine tal 1903, al à podût dedeâ il timp libar aes sôs passions, la piture e il teatri dai pipinots. Tal 1910 al à metût sù un Malo marionetno gledališče (Piçul teatri dai pipinots); passât il burlaç de Prime vuere mondiâl, Klemenčič al puarte indevant il so lavôr, che cumò al cjape il non di Teatri sloven dai pipinots (1920-24). Al rive il sucès: tal 1930 al ven sielzût tant che president onorari de associazion slovene dal teatri dai pipinots, doi agns plui tart al ven nomenât president onorari de socie par dute la Jugoslavie. Intant, tai agns jenfri Prime e Seconde vuere mondiâl, in Slovenie si à pardabon une sfloridure di compagniis che a inmanein spetacui di teatri di cheste sorte: cun di plui, tal 1933 la capitâl slovene e da acet al congrès de Associazion internazionâl dal teatri dai pipinots.
Klemenčič, lât a vivi a Lubiane, al mûr tal 1957: so grant mert al è stât crodi che cheste particolâr forme di teatri e varès vût sucès ancje in Slovenie. Une des sôs capacitâts e je stade chê di fâ sù par so cont i pipinots zontant custums e senis, scrivint ancje lis storiis li che a son protagoniscj. Buine part dai siei lavôrs, cjapant dentri ancje buratins in miniature cetant fins, si cjatin cumò li dal Teatri dai pipinots di Lubiane.
ALESSIO POTOCCO
__________________________________
VOCABOLARIUT PAR LÂ A TEATRI IN SLOVENIE
GLEDALIŠčE = teatri
OPERA = teatri de opare
SPORED = program
PREDSTAVA = rapresentazion, spetacul
ODER = palc
PONOVITEV = repliche
IGRALEC = atôr
IGRALKA = atore
VLOGA = part
(di un atôr)
GLEDALEC = spetatôr
VSTOPNICA = biliet
ABONMA = abonament
SEDEŽ = puest, sente

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +